Diker, osasungintzaren sektorerako injekzio bidezko plastikoetan Euskadi mailako erreferente bihurtu nahi duen ETEa

Diker injekzio bidezko plastikoen fabrikazioan lan egiten duen Gipuzkoako enpresa da eta, bost urteko epean, osasun-produktuetarako Euskadi mailako erreferente bihurtu nahi du. Gaur egun, konpainiak automobilgintzaren eta elektronikaren sektoreetan egiten du lan batez ere, eta elektronikarako mikroinjekzioko karkasak eta autoen marken enblemak egiten ditu, baina elikagaietarako ontziak ere eskaintzen ditu. Enpresak Eusko Jaurlaritzaren zibersegurtasun-programaren laguntza jaso du. Programa horrek zibersegurtasuna sustatzen du euskal enpresetan, gai horri buruzko egitura ekonomikoa sortuz, SPRIk antolatuta.

Enpresa 1993an sortu zen Oiartzunen familia-izaerarekin, eta izaera horri eusten dio gaur egun ere. Plastiko-injekzioaren arloan egiten du oraindik ere. 2000ko hamarkadan, sortzaileen seme-alabak sartu ziren enpresan. “Pandemiarekin, pabiloia handitu genuen eta, 2019an, aitak erretiroa hartu zuenean, belaunaldi arteko erreleboa gertatu zen”, aipatu du Dikerreko zuzendari Gaizka Garciak.

Belaunaldi mailako erreleboarekin, irudi korporatiboa aldatzeaz gain, tailer izatetik fabrika industrial izatera igaro zen eta, horretarako, “SPRIren laguntza jaso genuen Gauzatu programaren bidez. Guztira, milioi bat euroko inbertsioa izan zen. Hala, injekzio-fabrika modernoagoa izateko, instalazioak egokitu genituen”.

2019tik, Dikerrek osasun sektorearen aldeko apustu irmoa egin du eta merkatu-nitxo berri bat ireki du han. “Orain, injekzio-makina elektrikoetan eta digitalizatuetan inbertsioak egiteko fase berri batean sartuta gaude”.

Fabrikatzen dituzten produktuak auto-marketarako enblemak eta autoen kameretarako pieza funtzionalak dira. “Horretan gaude espezializatuta. Pieza kromatuak dira, pvd tratamendua dutenak (ez metalikoa), eta auto elektrikoetarako daude pentsatuta batez ere”. Gainera, sektore elektronikorako mikroinjekzioko piezak eta karkasak eta elikadura-erabilerako piezak ere eskaintzen dituzte (elikagaietarako ontziak, adibidez).

Honako sektore hauek dira haien produktuen hartzaile nagusiak: automobilgintza (salmenten % 65ean), elektronika (% 30ean).

17 langile ditu guztira eta urteko fakturazioa bi milioi euro ingurukoa da. Goi-teknologiekin lotutako lana dela eta, garrantzitsua da I+G arloa. “Polimeroen ikerketarekin lotutako bi Hazitek [programa] [SPRI Taldearenak] izan ditugu, eta txartel elektronikoei buruzko plastikozko injekzioarekin lotutako beste bat. Moldeak diseinatzeko ingeniaritza-saila eta bulego teknikoa ditugu, eta fabrikazioa, gero, inguruan azpikontratatzen dugu”.

Fakturazioaren % 7 jasotzen dute esportazioek eta batez ere Frantzian kokatzen dira; “dena den, Txilen ere badugu bezero bat”. Osasun arloari dagokionez, ikuspegia Euskadiko merkatuari arreta ematera bideratuta dago.

SPRI Taldearen zibersegurtasuneko programatik jasotako laguntza barne-zerbitzua digitalizatzera zuzendu da, “bezeroek proiektuak denbora errealean ere ikusteko aukera izan dezaten. Hala, une bakoitzean, bilakaera ikus dezakete”.

Etorkizunera begira, honako bi erronka hauek aipatu dituzte: urtero makinak eguneratzea eta, bost urteko epean, Euskadiko sektore medikoan erreferenteak izatea. “Injekzioko eta moldeen hornitzaileak izan nahi dugu sektore medikoan, eta makinak denbora errealean digitalizatu, prozesuen inguruko informazioa unean bertan izateko”.

SPRI Taldeak bere kanaletan euskal enpresei beren jardueraren berri emateko aukera eskaintzen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.