BAIC – Euskadiko Adimen Artifizialaren Zentroak 2025eko Batzar Orokorra egin du AAn lidergoa izateko begirada estrategikoarekin
Euskadiko Adimen Artifizialaren Zentroak (BAIC) 2025eko Batzar Orokorra egin du gaur Arabako Parke Teknologikoko Erakusketa Aretoan. AAren euskal ekosistemarentzat gakoa den hitzordu honetan, egungo 77 erakunde bazkide bildu dira, tartean, enpresak, erakunde publikoak, zentro teknologikoak eta unibertsitateak, guztiak ere teknologia horren garapen etiko, kolaboratibo eta subiranoarekin konprometituak.
Batzar Orokorrak, urtetik urtera, aukera eskaintzen du aliantzak indartzeko, aurrerapenak partekatzeko eta lan-ildo berriak aktibatzeko.
AAn estrategia zuzentzeko tresna zehatzak
Aurtengo edizioa aurreko ekitaldiko jarduerari buruzko errepaso formaletik haratago joan da, eduki estrategikoko bloke bat integratuz; hau da, “ThinkLAB: Lidergoa AAn zuzendaritza-taldeentzat”, erakundeetan eraldaketa-prozesuak zuzentzen dituztenei tresna praktikoak errazteko diseinatua.
Hasteko, Euskadin AAk egun duen egoera aztertu dute, nazioarteko beste ingurune batzuekin alderatzearekin batera, sortzen ari diren erronka eta aukerei erreparatuta. Ondoren, Nerea Arangurenek —Mondragon Korporazioko lehendakariordea, Danobat Group-eko zuzendari nagusia eta BAICeko lehendakariordea— hitzaldi inspiratzaile bat eman du eraldaketa teknologikoak markatutako testuinguruetako zuzendaritza-lidergoari buruz, esparru berri horretan erabakiak hartzen dituztenen zeregin estrategikoa nabarmenduz.
Eguneko une garrantzitsuenetako bat BAICen aurkezpena izan da:
- Zuzendaritza-taldeentzako AA lidergoko gida praktikoa, AAren inpaktu globala eta tokikoa testuinguruan kokatzen duena. Bertan, estrategia eraginkor bat definitzeko gakoak planteatzeaz gain, zuzendaritza-profilen araberako hausnarketa-esparru bat txertatzen du (CEO, COO, CFO, CIO, CTO, CHRO, CMO, CLO), funtsezko galdera, erantzukizun espezifiko eta aplikatzeko adibide eta guzti.
- Eduki horiek erakunde bakoitzaren errealitatean aplikatzeko diseinatutako lan-koadernoa, estrategia ekintza bihurtzen laguntzeko, lankidetzaren ikuspegitik eta balioetan oinarrituta.
“BAICetik zuzendaritza-taldeei lagundu nahi diegu prozesu eraldatzaile honetan. Kontua ez da soilik teknologia sartzea, baizik eta helburuarekin zuzentzea aldatzen doan ingurune batean. Hori dela-eta, gida hau sortu dugu. AAn lidergoa modu praktikoan eta gure errealitatera egokituta lurreratzeko”, adierazi du Laura Marronek, BAICeko zuzendari nagusiak.
BAICek indartu egin du Euskadin AA Aplikatuaren eragile gisa duen eginkizuna
Jardunaldiari amaiera emateko, networking gune bat egin da, erakundeen artean iritziak trukatu eta sinergia berriak bultzatzeko. Baina, topaketa puntualaz haratago, Batzarrean agerian geratu da erakunde bazkideek duten konpromiso kolektiboa, lankidetzan, espezializazioan eta epe luzerako ikuspegian oinarritutako eraldaketa teknologikoaren ereduarekiko.
BAICek Euskadiko Adimen Artifizialaren ekosistemaren barruan trakzio-eragile izaten jarraitzen du, metodologiak eta baliabideak aktibatuz eta erakundeei lagunduz, AA hartzeaz gain, helburu eta ikuspegi estrategikoarekin egin dezaten.
