AA sortzaileak bidea urratu du euskal enpresan, BRTA eta UIKen eskutik
Miramar Jauregiak “IA Generativa para Innovar en la Empresa” udako ikastaroa hartu du. BRTAk (Basque Research & Technology Alliance) antolatu du, UIKekin (EHUko Udako Ikastaroak) lankidetzan eta aliantza osatzen duten zentroen parte-hartzearekin. Jardunaldiaren helburua da teknologia disruptibo horren potentziala ikuspegi aplikatutik erakustea, eta profesionalak, teknologoak eta ikertzaileak biltzea kasu errealen, funtsezko tresnen eta jardunbide egokien inguruan, enpresa-inguruneetan ezartzeko.
“AA sortzailea benetako eragina izaten hasia da sektore ugaritan. BRTAtik lan egiten dugu ezartze kritikoa eta arduratsua errazteko, gaitasunak, datuen erabilera etikoa eta zentro, enpresa eta erakundeen arteko lankidetza sustatuz”, adierazi du Rikardo Bueno BRTAko zuzendari nagusiak.
AA sortzaileak industria aurreratuan, energian, osasunean eta antzeko sektore gakoetan duen eraginari buruzko sarrera-bloke batekin hasi da ikastaroa, eta gizartean ezartzeak dakartzan erronka nagusiei ere heldu die: kostuak, erregulazioa, jasangarritasuna, datuaren burujabetza eta OpenAI, Google eta Metaren moduko plataforma teknologiko global handiekiko mendekotasuna.
Bloke horri esker, partekatu ahal izan dira AA sortzailearen ezagutza teknikoa eta ingurune errealetako aplikazio praktikoa, eta teknologia horrek euskal enpresentzat eskaintzen dituen erronken eta aukeren hurbileko ikuspegia eman da.
Ondoren, mahai-inguru batek hainbat aditu bildu ditu, Euskadik AA sortzailea estrategikoki nola aprobetxa dezakeen eztabaidatzeko. Saioan zehar hainbat gai jorratu dira, hala nola ezagutza propioa sortzea, ekosistemako eragileen arteko lankidetza eta berrikuntza teknologikoa berme etiko, juridiko eta sozialekin uztartzeko beharra.
Hausnarketarako gune horrek mahai gainean jarri du zentro teknologikoek zein enpresek bete dezaketen zeregina teknologia hori modu arduratsu eta lehiakorrean erabiltzeko.
Jardunaldiaren bigarren zatia praktikari buruzkoa izan da, eta prestakuntza-bloke bat izan du ardatz. Bertan, modu irisgarrian azaldu dira kontzeptu gakoak, hala nola promptinga, RAG eredua (Retrieval-Augmented Generation) eta fine-tuninga. Gainera, AA sortzailearen soluzioen garapenean asko erabiltzen diren tresna batzuk aurkeztu dira: LangChain, LlamIndex, OpenAI eta Hugging Face.
Une gogoangarrienetako bat zuzeneko erakustaldia izan da. Pausoz pauso erakutsi da nola inplementatu teknika horiek erabilera-kasu zehatzetan.
Jardunaldiari jarraipena emateko, BRTA osatzen duten zentroetako ikertzaileek garatutako AA sortzailearen benetako aplikazio-kasuak aurkeztu dira. Esku-hartze horietan adibide zehatzak erakutsi dira. Adibidez, nola erabiltzen den teknologia hori barne-prozesuak hobetzeko, datuen kudeaketa optimizatzeko eta industria-inguruneetako zeregin konplexuak automatizatzeko.
Esperientzia horiei esker, zuzenean ezagutu ahal izan dira zentro teknologikoak eta ikerketa-zentroak identifikatzen ari diren onurak, oztopoak eta jardunbide egokiak, AA sortzailea euskal erakundeetan hedatu heinean.
Jardunaldia amaitzeko, hausnarketarako eta publikoak parte hartzeko espazio ireki bat izan da. Bertan, eztabaidatu ahal izan dira Euskadin adimen artifizial sortzailearen ezarpenari buruzko kezkak, proposamenak eta etorkizuneko ikuspegiak. Azken bloke horretan, inplementazio etiko, arduratsu eta jasangarrirantz aurrera egiteko ideiak eztabaidatu dira, eta nabarmen geratu da teknologia horrek planteatzen dituen erronkei aurre egiteko zentroen, enpresen eta erakundeen arteko lankidetzaren garrantzia.
Bestalde, Jon Kepa Gerrikagoitiak, BRTAko arduradun zientifiko-teknologikoak eta ikastaroaren zuzendariak, hau azpimarratu du: “Ikastaroak ikuspegi argi eta errealista bat eman du AA sortzailea benetako erakundeetan aplikatzeko moduari buruz, eta ezarpen-maila desberdinak erakutsi ditu —oinarrizko laguntzaileetatik hasi eta RAGa erabiltzen duen irtenbide aurreratuetaraino—, kasu bakoitzerako ikuspegi egokiena identifikatzen lagunduz”.
BRTA
Basque Research and Technology Alliance (BRTA) aliantza 2019an sortu zen, Euskadiko ikerketa aplikatuko eta garapen teknologikoko eragile nagusien arteko lankidetza sendotzeko. Helburu du ikerketan eta teknologian oinarritutako ezagutza euskal industriara eta enpresetara transferitzea eta, hala, lurraldearen lehiakortasuna eta garapen ekonomikoa sustatzea.
Ikerketa kooperatiboko 4 zentrok eta 13 zentro teknologikok osatzen dute aliantza: CIC bioGUNE, CIC nanoGUNE, CIC biomaGUNE, CIC energiGUNE, Azterlan, Azti, Ceit, Cidetec, Gaiker, Ideko, Ikerlan, Leartiker, Lortek, Neiker, Tecnalia, Tekniker eta Vicomtech.
