SOC-Ek bere kokapen zientifiko-teknologikoa sendotu nahi du esparru aeroespazialean

SOC-E (System On Chip Engineering) elektronikan eta komunikazioetan espezializatutako enpresa da. Teknologia hornitzaile liderra da erabilgarritasun handiko sare deterministetan (non mezuen transmisioa denbora jakin batean ziurtatuta dagoen), azpimikrosegundotan sinkronizatzen direnak, baita sektore kritikoarentzat zibersegurtasun soluzioetan. 

Hain esparru zabalean, enpresa bizkaitarrak esparru aeroespazialean duen posizio zientifiko-teknologikoa finkatzea du helburu, sektoreko bezeroei (Airbus, Boeing, Lockheed Martin edo Blue Origin) erantzuna ematen jarraitzeko. Horretarako, industria aeronautikora bideratutako TSN (Time-Sensitive Networking) komunikazioetarako switch/router ekipo ziberseguru bat diseinatu eta fabrikatzeko proiektua garatzen ari da. 

Aeronautikaren sektorea gero eta gehiago ari da erabiltzen Etherneten oinarritutako protokoloak komunikazioetarako, frogatutako errendimendu, fidagarritasun eta eskalagarritasunagatik: “Sektorearen joerekin lerrokatzean, aireontzien fabrikatzaileek eta operadoreek Ethernet teknologiaren aurrerapenak eta berrikuntzak balia ditzakete aire-gailuen gaitasunak eta eraginkortasuna hobetzeko”, azaldu du SOC-Eko CEOak, Mikel Idirinek. 

“Azken urteotan, aeronautika-merkatuak gero eta interes handiagoa du TSN teknologian oinarritutako komunikazio ziberseguruen soluzio egiaztagarriak lortzeko, eta, horren ondorioz, sektore aeroespazialerako TSN profil espezifiko bat sortu da, aireontzien sistemetan sare-teknologia aurreratuak integratzea errazten duena, abiazio-eragiketa seguruagoak eta eraginkorragoak ahalbidetuz, industriaren aurrerapenekin eta arau erregulatzaileekin bat etorriz”, gehitu du Idirinek. 

I+G proiektu honi ‘AEROSECURE: switch/router zibersegurua denbora errealeko aplikazio aerotransportatuetarako’ deritzo, eta 2026. urtearen amaieran amaituko da. Proiektua garatzeko, enpresak CDTIren laguntza jaso zuen iaz, 1.203.124 euroko finantzaketarekin. “SOC-Erentzat, estrategikotzat jotzen da proiektu hau gauzatzeak DAL-D kritikotasun-maila lortzeko hardware eta software diseinuan beharrezkoak diren kalitatea ziurtatzeko prozedurak enpresan integratzeko balio izatea, DO-254 eta DO-178C arauen arabera, hurrenez hurren”, dio CEOak. 

Idirinen arabera, “aeroespazioaren TSN profila estandarizatzeko merkatuaren motibazioa komunikazio aeroespazialeko sistema modernoen eskakizun zorrotzei erantzuteko beharrean datza. Ingurune aeroespazialek sinkronizazio zehatza, fidagarritasun handia eta komunikazio determinista eskatzen dute abionika kritikoko aplikazioetarako, hala nola hegaldia kontrolatzeko sistemetarako, edo aireontzian muntatutako sentsore eta eragingailuetatik datozen datuak garraiatzen dituzten sareetarako”. 

Hala, aeroespazioko TSN profil horrek handitu egiten ditu TSN osatzen duten Ethernet sareetarako arauen multzoaren gaitasunak, betekizun espezializatu horiek betetzeko. “Aplikazio aeroespazialetara egokitutako profil bat definitzean, arauak hainbat abionika-sistematan elkarreragingarritasuna, fidagarritasuna eta errendimendu aurreikusgarria bermatu nahi ditu, Etherneten abantailak, eskalagarritasuna, estandarizazioa eta errentagarritasuna baliatuta”. 

Bestalde, Idirinek azpimarratu du egungo edozein komunikazio-soluziok zibersegurtasuna aintzat hartu behar duela produktuaren beraren ikuspegitik: “Komunikazio-sistema aerotransportatuak, abionika-sareak, hegaldia kontrolatzeko sistemak eta hegazkinen entretenimendua barne, gero eta interkonektatuago daude eta teknologia digitalen mende daude, eta horrek zibererasoen aurrean zaurgarri bihurtzen ditu”. Eta horixe da, hain zuzen ere, AEROSECURE proiektuaren erronka handienetako bat. 

Azken finean, proiektu honekin, SOC-Ek hobekuntza batzuk garatu nahi ditu, besteak beste, “sektore aeroespazialean azken ekipamendurako eskatzen den sendotasun- eta fidagarritasun-planoa gehitzea”, SOC-Ek know-how nahikoa baitu hornitzaile teknologiko gisa, baina ez azken ekipoaren hornitzaile gisa; eta “hasierako abiapuntu batean kokatzea irizpidez ebaluatu ahal izateko eta modu informatuan erabaki ahal izateko, proiektu honen bidez bultzatutako prozesuko hobekuntzekin (DA-D) lortu nahi dena baino Segurtasun Funtzionaleko maila handiagoko soluzioen balizko garapenei buruz”.  

Eusko Jaurlaritzak zibersegurtasuna bultzatzen du euskal enpresetan, gai horri buruzko ehun ekonomiko bat sortuz, SPRIk artikulatua.