Lantegi Batuak ere maskarak eta aurpegi-babesak fabrikatzen hasi da
Antolakundeko lau lantegik euren jarduera berrorientatu dute NBEak ekoizten hasteko.
Ikusirik ikaragarri hazi dela Norbere Babeserako Elementuen eskaera, batik bat osasun sektorean eta arreta zerbitzuetan, Lantegi Batuak antolakundeak erabaki du bere jarduera industrialaren zati bat birbideratzea eta maskarak eta aurpegi-babesak fabrikatzen hastea.
Zalla, Sestao, Abadiño eta Txibilan kokatutako instalazioetan automoziorako osagaiak ekoizten dituzte normalean, baina, une honetan, 70 pertsonaz osatutako plantilla premia biziko elementu horiek fabrikatzen ari da. “Automoziorako jarduera industriala geldituta dago, ez delako funtsezkoa. Horregatik, une honetan behar-beharrezkoak diren ondasunak fabrikatzeko aprobetxatu dugu gure gaitasuna” dio Txema Francok, Lantegi Batuak-eko zuzendari nagusiak.
Lau zentro industrialek goi-mailako segurtasuneko 10.000 maskara eta 10.000 aurpegi-babes fabrikatzen dituzte astero. Produktu horiek osasun arloko profesionalei eta funtsezko zerbitzuetako langileei helarazten dizkiete, hau da, zaharren egoitzetakoei, ezgaitasunak dituzten pertsonen egoitzetakoei, garbiketako langileei eta zuzeneko arreta eskaintzen dutenei.
Horrez gain, Lantegi Batuak-ek bere jarduera mantentzen du funtsezkotzat jotzen diren sektoreetan, besteak beste, argindar industriaren hornidura-katean, eta zerbitzuei dagokienez, berriz, garbiketa-lanetan zentratu dira gehienbat. “Zaharren egoitzetarako garbiketa-zerbitzuetan zentratzen ari gara, une hauetan funtsezkoa baita” dio antolakundeko zuzendariak, “bestalde, jarduera hori indartu dugu oraindik zabalik jarraitzen duten eta COVID 19ari aurre egiteko protokoloak areagotu behar dituzten enpresetan”.
Azken asteotan antolakundeak ahalegin berezia egin du baita ere pertsona nagusientzat edo ezgaitasunak dituzten pertsonentzat elikagaiak egin eta banatzeko zerbitzuan. Etxejan zerbitzuaren bitartez, Lantegi Batuak-ek etxerako 270 menu banatzen ditu egunero Bizkaian. Orobat indartu dute produktu laguntzaileen (ohe artikulatuak eta transferentziarako garabiak) hornikuntza etxean laguntza behar dutenentzat eta egoera zaurgarrian daudenentzat.
Lantegi Batuak antolakunde pribatu bat da, irabazi asmorik ez duena eta ekonomia sozialaren arlora biltzen dena. Lantegi Batuak-ek lan-aukerak sortzen ditu ezgaitasuna duten pertsonentzat, eta 3.000 pertsona baino gehiago enplegatzen ditu bere 25 zentroetan eta zerbitzu osagarrien sarean, horietatik 2.700 ezgaitasuna dutenak.
