Euskadi, itsas-energia eolikoan espezializatutako Koreako azokan
SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren Hego Koreko bulegoak bi egunetan sektore eolikoko profesional ugari gehiago bildu dituen Offshore Wind Supply Chain Exhibition & Conference 2025 azokaren bigarren edizioan parte hartu du aste honetan, Koreako Busan portu-hirian.
Korea Wind Energy Industry Association (KWEIA) delakoak antolatutako ekitaldi hau da itsas-energia eolikora mugatuta egiten den herrialde hartako azoka bakarra. Oraingo edizioan, BasqueTradek informazio-standa eraman du, eta bertatik, euskal industriak arlo honetan dituen gaitasunak sustatu ditu, Euskadi industria eolikoko eragile nagusien aurrean ordezkatuz.
Erakusketak Koreako merkatuko garatzaileak, osagaien eta eragiketa eta mantentze-lanetako (O&M) soluzioen hornitzaileak eta eremu eolikoari lotutako elkarte eta erakundeak bildu ditu. Parte-hartzaileen artean, CIP/COP Korea, Corio Generation, SK Oceanplant, Doosan Enerbility eta Unison bertaratu dira, besteak beste. Gainera, programako hitzaldietan, Hego Koreako merkatu eolikoaren potentziala, azken erregulazio-aldaketak eta itsas-energia eolikorako prezio finkoko enkanteak jorratu dira.
Azokaren bi egunetan, BasqueTraderen Hego Koreako bulegoak bilerak antolatu ditu Koreako hornidura-kateko hainbat eragilerekin, euskal industria-enpresek offshore merkatu eolikoan duten potentziala ezagutzera emateko.
Helburu hori bultzatzen jarraitzeko, BasqueTradek presentzia indartzeko asmoa du ekitaldiaren hurrengo edizioetan, baterako pabiloia antolatuz, euskal enpresei Koreako merkatuan sartzeko eta itsas-energia berriztagarrien arloan dituzten soluzioak aurkezteko aukera eskaintzeko asmoz. Etorkizuneko ekimenen artean, intereseko aukerak identifikatu dira Jeollanam-do eskualdean 3,2 GWeko potentzial estimatuarekin aurreikusita dauden itsas-energia eolikoko proiektuetan.
