Basque Trade & Investment
Albisteak 14 maiatza, 2025

Eusko Jaurlaritzak Euskadiren eta Japoniaren arteko ekonomia- eta enpresa-harremanak estutzen jarraitzen du

Mikel Jauregi sailburua Japoniako Finantza ministrordearekin bildu da, eta erakundeen, ekonomiaren eta enpresen arloko zenbait topaketatan parte hartu du, Euskadiren eta Japoniaren arteko harremanak sendotze aldera.
-
  • “Muga-zergen gerraren aurrean, sinetsita gaude Japoniarekin harremanak estutzea funtsezkoa dela, Japonian ezagut ditzaten Euskadik teknologian eta industrian dituen lehen mailako gaitasunak, eta Europan erreferentziatzat har dezaten balizko inbertsioei begira”, aditzera eman du Jauregi sailburuak.

Mikel Jauregi Industria, Trantsizio Energetiko eta Jasangarritasuneko sailburua eta Andoitz Korta Industria Sustatzeko sailburuordea Japoniara joan dira, Euskadiren eta Japoniaren arteko harremanak estutzen jarraitzea helburu duen erakunde, enpresa eta ekonomiaren arloko topaketen agenda bizia garatzeko.

Japonia eta, oro har, Asia-Pazifikoko eskualdea interes bereziko eremua dira Euskadirentzat eta bertako merkataritza-harremanentzat; izan ere, eskualde hori Euskal Autonomia Erkidegoko industriaren sektore estrategiko gehienetan (energia, sare elektrikoak, makina-erreminta, telekomunikazioak) hazkunde ekonomikorik handiena izango duen munduko eskualde gisa katalogatuta dago, eta Euskal Autonomia Erkidegoko enpresa ugari daude eskualde horretako merkatu nazionaletan. Eusko Jaurlaritzak, 2022tik, bulego komertzial bat du Tokyon, Basque Trade & Investment – SPRI Taldearen Nazioartekotzeko Euskal Agentziaren 23 bulego komertzialek osatzen duten Kanpo Sarean txertatuta (mundu osoko 90 herrialde baino gehiagori zerbitzu egiten dieten 23 merkataritza-bulegok osatzen dute kanpo-sare hori).

Gainera, oso herrialde industrializatua den heinean, Japoniak zenbait sektore estrategiko ditu, eta sektore horietan aukera handiak daude Euskal Autonomia Erkidegoko enpresen esportazioetarako, bereziki automozioaren, energiaren, makina-erremintaren, biozientziaren eta elektronika eta telekomunikazioen arloetan. Maila instituzionalean, 2018an eta 2019an Euskadiren eta Japoniaren arteko harremanak nabarmen estutu ziren, eta energiaren arloko hitzarmen bat sinatu zen Fukushimako prefekturarekin eta fabrikazio aurreratuaren arloko beste hitzarmen bat Mieko prefekturarekin.2023an, Eusko Jaurlaritzak agenda instituzional, ekonomiko eta enpresarial zabala garatu zuen, “Euskadi-Japonia 2023 urtea” lankidetzaren barruan. Aldebiko lankidetza hori 2024ko urtarrilean amaitu zen, eta Euskadiren nazioarteko proiekzioaren arloko aurreikuspenak gainditu zituen urte baten amaiera izan zen.

 

Mikel Jauregi sailburuak Japonian izango duen agenda

Jauregi sailburuaren bidaiari hasiera eman zaio Eusko Jaurlaritzak Tokyon duen merkataritza-bulegora egindako bisitarekin. Moe Kato zuzendariak egin dio harrera han. Sailburuak bertatik bertara ezagutu ahal izan du bulegoak egindako lan proaktibo garrantzitsua, bai negozioaren garapenean lagunduko duten kontaktuak identifikatzeko, bai Japonian finkatuta dauden edo herrialdean finkatu nahi duten Euskal Autonomia Erkidegoko enpresentzako aukerak identifikatzeko —Euskadin interesak dituzten Japoniako konpainientzako aukerak identifikatzeko ere bai—.Era berean, Industriaren Defentsarako Taldeak Euskadiren nazioartekotzea indartzeko eta muga-zergen gerraren aurrean merkatu berriak bilatzeko garatu dituen estrategiak ere aztertu ahal izan dituzte.

Arlo instituzionalean, sailburua Kuniyoshi Azuma Finantza ministrordearekin bildu da —Japoniak atzerrian egiten dituen inbertsioen arduraduna—. Bi agintariek Euskal Autonomia Erkidegoko eta Japoniako errealitate ekonomikoa aztertu dute, baita Trump Administrazioak eragindako merkataritza-gerraren ondoren zabaldu den agertokia ere. Horrez gain, Euskadin finkatutako Japoniako enpresei eta gure herrialdean dauden enpresa- eta inbertsio-aukerei buruz ere hitz egin dute.

Bestalde, Taiwan eta Japoniaren arteko harremanak estutzea helburu duen Sakura Fundazioaren batzarrean parte hartu du sailburuak. 2012 eta 2020 artean Japoniako lehen ministro izandako Shinzo Abe-ren alargun Akie Abe buru dela, Sakura Fundazioak sailburuari helarazi dio Eusko Jaurlaritzari egindako errekonozimendua, honek bi herrialdeen arteko harremanak estutzeko egin duen ahalegina aitortuz eta 2024ko amaieran Gernikan gereziondo japoniar bat landatu izana nabarmenduz.

Horrez gain, Yoshinori Ueda JWPA – Japan Wind Power Association erakundeko zuzendariarekin ere bildu da. Erakunde hori Japonian energia eolikoa ekoizten duen enpresa-elkarte garrantzitsua da, eta Euskadik 2018. urtetik du harremana erakunde horrekin. Azken urteotan hainbat topaketa egin dira JWPAren eta Euskadiren artean, Energiaren Euskal Klusterrarekin batera, energia eolikoaren sektoreko enpresa-aukeretan lan egiteko, Japonian zein Euskadin, bereziki offshore arloan.

Bidaiari amaiera emateko Yohei Sasakawa eta Meiko Nakabayashi Sylff fundazioko eta The Tokyo Foundation fundazioko presidenteekin, hurrenez hurren, bildu da. Bi erakundeek lan handia egiten dute talentu bikaina erakarri eta prestatzeko, lidergoa garatzeko eta abangoardiako politika publikoak garatzea helburu duen ikuspegi estrategikoa sortzeko. Sylff Fundazioak harreman estua du Deustuko Unibertsitatearekin, aspalditik hainbait proiektutan kolaboratuz.

Japoniara egindako bidaiaren amaieran, Mikel Jauregi sailburuak aditzera eman duenez, Japoniak “aukera interesgarriak ditu Euskadirentzat, eta bost arlotan du bereziki lehentasuna: energia berriztagarriak; automozioa; makina-erreminta eta fabrikazio aurreratua; bio-osasunaren industria; eta kontsumo-elektronika eta erdieroaleak.Japonia munduko hirugarren ekonomia da, eta industriak bertako barne-produktu gordinaren % 30 inguru hartzen du, Euskadiren antzeko ehunekoa”.

“Sinetsita gaude Japoniarekin harremanak estutzea funtsezkoa dela, hango enpresek teknologiaren eta industriaren arloetan Euskadik duen lehen mailako ahalmena ezagut dezaten eta Europan erreferentziatzat har dezaten, balizko inbertsioei begira, baita gure enpresek Japonia aukera-merkatutzat har dezaten erreferentzia garen industria-sektoreetan, hala nola berriztagarrietan edo automozioan”. Euskadi globalaz ari garenean, gure herrialdea munduan abangoardiako industria duen lehen mailako bazkidetzat har dezaten bilatzen dugu. “Industria gehiago, industria hobea eta emisio txikiagokoa” gure estrategiak berarekin dakar kanpotik inbertsioak erakartzeko eta euskal enpresari nazioartekotzean laguntzeko lan egitea. Etxe Zuriak eragindako muga-zergen gerraren ondoren, beste merkatu batzuk bilatu behar ditugu gure industriarentzat, eta gure apustua da Europatik beste lurralde batzuetara zabaltzen jarraitzea, hala nola Japoniara, herrialde horrekin lankidetza-ibilbide luzea baitugu hainbat arlotan”, adierazi du Jauregi sailburuak.

Lotutako albisteak

Lehendakariak  konpromiso  eta  bizkortasun  handiagoa  eskatu  die  Europari  eta  Estatuari,  euskal  altzairuaren  etorkizuna  bermatzeko
21/10/2025 Kluster politika

Lehendakariak konpromiso eta bizkortasun handiagoa eskatu die Europari eta Estatuari, euskal altzairuaren etorkizuna bermatzeko

Imanol Pradales Lehendakariak ‘Steel Tech 2025’ inauguratu du, BECen, urriaren 21etik 23ra izango den siderurgia-sektorearen nazioarteko elkargunea

Euskadik  indartu  egin  du  Poloniarekin  duen  lankidetza  industriala,  euskal  esportazioen  hamar  helmuga  nagusien  artean

Euskadik indartu egin du Poloniarekin duen lankidetza industriala, euskal esportazioen hamar helmuga nagusien artean

Imanol Pradales: “Kontinentearen lehiakortasun industriala bermatzea posible izango bada, gure indarrak batuta, sinergia berriak bilatuta eta norabide berean eginda izango da”

Euskadik  itsasoko  energia  eolikoan  duen  nazioarteko  posizionamendua  indartu  du  Japonian
16/10/2025 Nazioartekotzea

Euskadik itsasoko energia eolikoan duen nazioarteko posizionamendua indartu du Japonian

Euskadik eta bere industria sareak GOWS 2025ean duten parte hartzea sektoreko enpresa liderrekin eta nazioarteko erakundeekin lankidetza esparru batean garatzen da

Eusko  Jaurlaritzak  nazioartekotzea  bultzatu  du  9,5  milioi  euroko  laguntzen  bidez

Eusko Jaurlaritzak nazioartekotzea bultzatu du 9,5 milioi euroko laguntzen bidez

Enpresek Zabaldu, Sakondu eta Elkartu programetarako diru-laguntzak eska ditzakete.

Nazioartekotzerako  enpresa-lankidetzari  bultzada,  Elkarturekin
10/10/2025 Nazioartekotzea

Nazioartekotzerako enpresa-lankidetzari bultzada, Elkarturekin

Urriaren 14an Elkartu programaren deialdi berri bat irekiko da. Nazioartekotze-jardueretarako enpresen arteko lankidetza bultzatzea da programaren xedea. 1.000.000 euroko aurrekontua du programak, eta nazioartean duten posizionamendua hobetu nahi duten enpresa-lankidetzako elkarte eta taldeei zuzenduta dago.

Europako  Batzordeak  proposamen  bat  iragarri  du  beste  herrialde  batzuetatik  datorren  altzairuaren  muga-zergak  %50era  igotzeko  eta  haren  jatorriaren  trazabilitatea  indartzeko

Europako Batzordeak proposamen bat iragarri du beste herrialde batzuetatik datorren altzairuaren muga-zergak %50era igotzeko eta haren jatorriaren trazabilitatea indartzeko

Xedapen horiek Europako Parlamentuak eta Kontseiluak erregelamenduaren azken testua adostu ondoren aplikatuko dira, 2026ko ekainetik aurrera altzairuaren gaineko egungo babesa ordeztuko duena.

WOMEXen  Eskualde  Taldea  martxan  da  Euskadin,  nazioartekotzean  genero-berdintasuna  sustatzeko
09/10/2025 Berdintasuna

WOMEXen Eskualde Taldea martxan da Euskadin, nazioartekotzean genero-berdintasuna sustatzeko

Enpresa, erakunde, irakaskuntza eta elkarte arloko eragileak joan den astean bildu ziren Euskadiko Eskualde Taldearen lehen saioan, WOMEX - The role of women in the competitiveness of exporting SMEs proiektu europarraren esparruan.

KSP  Basque  P5G  Master  Plan  programak  Euskadiren  eta  Hego  Korearen  arteko  lankidetza  sendotu  du  berrikuntzan  eta  digitalizazioan
02/10/2025 Nazioartekotzea

KSP Basque P5G Master Plan programak Euskadiren eta Hego Korearen arteko lankidetza sendotu du berrikuntzan eta digitalizazioan

Proiektuaren helburua 5G sare pribatuen hedapenari buruzko ezagutzak eta esperientziak partekatzea izan da, euskal industrian aplikatzeko aukerak eta erronkak identifikatuz.

IKT  sektoreko  euskal  enpresek  euren  presentzia  indartu  dute  Kolonbian,  Bogotan  egindako  topaketa  batean
25/09/2025 Nazioartekotzea

IKT sektoreko euskal enpresek euren presentzia indartu dute Kolonbian, Bogotan egindako topaketa batean

Kolonbian dauden euskal enpresen eta tokiko eragile estrategikoen arteko harreman zuzena erraztu da

Industria  sailburua  EMO  Hannoverren  dauden  32  euskal  enpresen  alboan  izan  da

Industria sailburua EMO Hannoverren dauden 32 euskal enpresen alboan izan da

Azken hamarkadan, Eusko Jaurlaritzak makina-erremintaren sektoreari SPRIren bitartez lagundu dio: 91 milioi euroko dirulaguntzaren bidez 850 milioi eurotik gorako inbertsio pribatua egin da eta 2.000 enpresa baino gehiago babestu dira

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.