Artechek soluzioak instalatu ditu AEBetako parke eoliko batean
Euskal enpresak urtean 1,9TWh sortuko dituen instalazio eoliko berri baten proiektuan parte hartu du Texasen
Sektore elektriko nahiz elektronikorako soluzioen garapenean espezializatuta dagoen Arteche konpainiak kondentsagailu automatikoetarako bateriak diseinatu eta instalatu ditu Estatu Batuetako Texas estatuan kokatuta dagoen High Lonesome parke eolikoan, urtean 1,9 TWh inguru ekoiztu eta 1,2 milioi tona CO2 baino gehiagoren isurpena saihesteko.
Euskal enpresa arduratu da 34,5 kV eta 27 MVAr nahiz 34,5 kV eta 48 MVArreko kondentsagailu automatikoetarako bateria ereduak ekoiztu eta probatzeaz, instalazioaren bideragarritasuna eta energia-sorkuntzari buruzko aurreikuspenak bermatzeko xedez.
Proiektua garatu zen bitartean, Artecheko lantaldea parke eolikoaren instalazioetan izan zen muntatzeko eta abian jartzeko lanak gainbegiratzeko, egonkortasuna bermatzeaz gain.
