NUUK Mobility Solutions, motor elektriko adimendun, seguru eta berritzaileak
Nuuk Mobility Solutions (NMS) enpresa gazte bat da, ibilgailu elektriko arin eta adimendunentzako konponbide globalak eskaintzen dituena; produktu propioaz gain, mantenimendu, konektagarritasun eta finantzaketako zerbitzu osagarriak eskaintzen ditu. Sei urteko ibilbidea baino ez badu ere, aurreikusten du aurten 17 milioi fakturatuko dituela. Enpresa horrek SPRI Taldearen zibersegurtasun industrialeko programaren laguntza jaso du.
Zornotzako AIC (Automotive Intelligence Center) zentroan kokatutako konpainia hau 2017an sortu zen, eta 2018rako merkatuan zuten euren lehen motor elektrikoa, helburutzat izanik kalitatezko produktua eskaintzea. “Mugikortasun elektrikoko konponbide arin, adimendun eta seguruak eskaintzen dituen enpresa bat gara” adierazi du Ixone Busturia Maletek, NMSko zuzendariaren ondokoak.
Euren produktuak ibilgailu arinen kategorian sartzen dira, “hasi patineteetatik eta kuatrizikloetaraino”, adimendunak dira “konektatuta daudelako eta askotariko datuak (kontsumoa, gidatze mota, geo-kokapena eta telemetria) sortzen dituztelako denbora errealean”, eta, gainera, seguruak dira, “baldintza hori beti izan delako funtsezkoa guretzat”.
Beren jarduera ez da mugatzen ibilgailu adimendun elektrikoak eskaintzera, zeren enpresa honek zerbitzu osagarriak ere eskaintzen baitizkie bezeroei, hala nola mantenimendu profesionala, konektagarritasuna eta flotak erosteko finantzaketa.
NMSren hasierako produktua Gen motorra da, bere erabileraren arabera hiru bertsiotan eskaintzen dena. Bestalde, produktuak neurrira diseinatzeko zerbitzua eskaintzen du, eta Correos da (dagoeneko baditu NMSren 600 produktu) bere bezero nagusia. Hasierako modeloa eboluzionatu dute eta Cargopro izeneko produktu berri bat sortu dute Correosentzat. Banaketako motor konbentzional batekin konparatuz, Cargopro modeloak karga-gaitasun handia eta bateria finkoak ditu, eta beste pertsonalizazio batzuk ere bai. “Correosen jadanik ez dituzte gutun-azalak bakarrik garraiatzen, baita pakete handiak ere. Gure motorra egonkorragoa da, eta aukera ematen du 180-200 litroko bolumenak segurtasunez garraiatzeko”. Horrez gain, konektagarritasun eta mantenimendu zerbitzuak ere eskaintzen dituzte.
Gainera, “Eurocybcar enpresaren ESTP estandarren arabera eginiko Aenor-en Zibersegurtasun Ziurtagiria duen munduko lehen ibilgailua da. Ziurtagiri hori derrigorrezkoa izango da 2024ko uztailetik aurrera Europan saltzen diren ibilgailu guztientzat; momentuz arau hori ez zaie aplikatzen ibilgailu arinei, baina NUUKen aurrea hartzea erabaki dugu”.
Datorren apirilaren 25ean ekitaldi bat egingo dute Zibersegurtasun Ziurtagiria ofizialki jasotzeko.
Etxerako janari banaketa
Etxerako janari banaketaren merkatuan ere sartu da enpresa. “Duela gutxi merkaturatu dugu Ciklo izeneko hirugarren modelo bat, bereziki arlo horretara bideratua”. Gainera, sidecar bat duen modelo bat prestatzen ari dira, “zeina izan baitaiteke zamalanetarako edo turismoaren sektorerako, eta une honetan homologazioko tramiteak bukatzen ari gara”.
Hala, pakete globala eskaintzen diote bezeroari, merkatuan beste inork eskaintzen ez duen zerbitzua alegia. “Ez dugu ezagutzen negozio-eredu honekin pakete osoa eskaintzen duen hornitzailerik. Merkatu sortu berria da, eta etengabe aldatzen ari dena”.
Plantillan 36 langile daude, “35 urte dituzte batez beste, eta guretzat oso garrantzitsua da jendea trebatzea gurekin jarrai dezan”. Beren aurreikuspenen arabera, aurtengo ekitaldian 17 milioi euro fakturatuko dituzte, 6 zerbitzuen sektorean eta 11 ibilgailuen salmentan. I+G oinarrizkoa da beren negozioan, eta aurten 1,8 milioi bideratuko dituzte arlo horretara, fakturazio osoaren % 10.
SPRI Taldearen zibersegurtasun programako laguntza baliatu dute Zibersegurtasun Ziurtagiria duen lehen ibilgailuaren teknologia aplikatzeko. “Dagoeneko garatuta dago. Orain ikasitakoa inplementatzen ari gara”.
Etorkizuneko erronkei dagokienez, NMSk helburutzat dauzka bere salmentak bikoiztea, ibilgailuen katalogoa zabaltzea, plantilla sendotzea eta nazioartekotzea. “Dagoeneko 50 motor entregatu dizkiogu Costa Ricako Correosi”, eta lanean ari gara Portugaleko Correosekin. Espainiako Correosek bost milioi kilometro egin ditu motor hauekin bi urtean, eta datozen hilabeteetan beste 400 motorreko lote bat entregatuko diote.
“Bezeroak eta gizartea elektrifikatzen ari gara: eskaintza ekologiko-ekonomiko bat proposatzen dugu, orekatua eta irisgarria, baina automobilgintzak beti izan duen alderdi emozionala galdu gabe”.
Lotutako albisteak
EBN 2025 kongresua BIC Bizkaia Ezkerraldean egingo da
Kongresua aukera paregabea izango da industria-energia trantsizioaren inguruan eztabaidatzeko, gure lurralde eta ekonomien etorkizunerako funtsezko gaia baita.
Epea eta aurrekontua zabaldu ditugu, adimen artifizialeko teknologiak barne hartzen dituzten eta Euskadiko enpresen datuen azpiegitura optimizatzen duten proiektuak babesteko.
Laguntza horiek Europar Batasunak finantzatzen ditu NextGenerationEU berreskuratze-planaren bidez, pandemiak eragindako kalteak konpontzeko eta etorkizun jasangarriago, digitalago eta erresilienteago baten oinarriak ezartzeko. Espainian, funts horiek Berreskurapen, Eraldaketa eta Erresilientzia Planaren bidez kudeatzen dira.
INIZIA sariak banatu dituzte, INIZIA DAY jardunaldian
Horien helburua da oinarri teknologikoa duten eta/edo berritzaileak diren enpresa egitasmoak biltzen dituzten proiektuak aitortzea
Ekintzaileentzako laguntzak: Bihur ezazu zure negozio ideia enpresa berritzaile eta errentagarri Ekintzailerekin
Ideia berritzaile bat duzu eta enpresa bihurtu nahi duzu? Orduan interesatzen zaizu Ekintzaile 2025, programa ezagutzea. Ekintzailetza bultzatzeko laguntza horrek laguntza ekonomikoa eta adituen aholkularitza eskainiko dizkizu zure proiektua bideragarria eta arrakastatsua izan dadin.
Nola izan enpresa ekintzaile bat Barnekintzaile programarekin, barne-ekiteko laguntza.
800.000 euroko aurrekontua du Barnekintzaile 2025 barne-ekintzailetzarako laguntza-programaren edizio berriak. Enpresa-proiektu berriak garatzeko edo jarduera berrietara dibertsifikatzeko laguntza eskuratu nahi duten enpresek abenduaren 11ra arte aurkez ditzakete eskaerak.
Iritsi da zure datuak eta zerbitzuak hodeira migratzeko unea. Aprobetxatu euskal enpresentzako Kloud laguntza
Kloud programak Euskadiko enpresei haien zerbitzu edo azpiegitura informatikoak Cloud ingurune komertzialetara migratzeko aukera eskaintzen die. Horretarako, enpresa bakoitzeko 50.000 € arte eskaintzen du hodeirako migrazio-prozesu osoa diseinatzen eta ezartzen lagunduko dien kanpoko enpresa bat kontratatu ahal izateko. Azaroaren 10ean amaituko da laguntza hori eskatzeko epea.
ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
230 erakunde baino gehiagoko 500 pertsona bildu dira, eta Euskaditik berrikuntza teknologikoarekin konprometitutako komunitate aktiboa sendotu da
Eusko Jaurlaritzak eta Hithium enpresak akordio estrategikoa sinatu dute, Europako biltegiratze egonkorraren industria gidatzeko
Hitzarmenari esker, Euskadin biltegiratze egonkorreko sistemak fabrikatzea ahalbidetuko duen soluzio integral baten garapenean lan egingo da, erreferentziazko bazkide industrial batekin elkarlanean eta Euskal Autonomia Erkidegoko zentro teknologikoen babesarekin
Eusko Jaurlaritzak startup teknologikoak sortzea bultzatuko du, 2,5 milioirekin ekintzailetzarako laguntzetan
Maiatzaren 16an irekiko ditu SPRIk Ekintzaile eta Barnekintzaile programak
Nuavisek balio erantsi handiko ikusmen artifizialeko soluzioak eskaintzen dizkio industriaren eta elikagaien sektoreari
Enpresak aktiboak monitorizatzeko sistemak garatzen ditu prozesu industrialak hobetzeko