IMG Pharma enpresak plataforma bat sortu du koloneko eta ondesteko minbiziaren diagnostikoa hobetzeko
Bizkaiko enpresa hori CIC Boston zentrora joango da bere negozio-eredua garatzera
IMG Pharma farmakoen analisi masiborako tresna bio-teknologikoen garapenean espezializatutako enpresa bat da. Teknologia horietatik abiaturik eta tumore-zelulen bio-markagailuak 4 urte baino gehiagoz ikertu ondoren, euskal enpresa horrek plataforma bat sortu du koloneko eta ondesteko minbizia diagnostikatzeko.
Aplikazio horrekin minbizi-zelulak detektatu daitezke pazientearen gorozkiak analizatzean, horrek nabarmen murriztuko duelarik positibo faltsuen portzentajea. “Osasun-zerbitzuek gorozkietako odola detektatzeko egiten duten proba ez da batere espezifikoa: positibo ematen duten kasuen %10ak bakarrik izaten du minbizia. Horregatik, diagnostikoa egiaztatu egin behar izaten da gero kolonoskopia batekin” azaldu du Egoitz Astigarragak, IMG Pharma enpresako kudeatzaileak, “gure helburua ez da bi proba horiek ordezkatzea, baizik eta bien artean sartzea, zehaztasun handiagoz jakiteko nork duen koloneko minbizia kolonoskopia bezalako prozedura inbaditzailerik egin beharrik gabe”.
Lantaldea baliozkotze-probak egiten ari da, eta momentuz emaitza oso onak lortu dituzte. Plataforma horri esker, IMG Pharma Bizkaia International Startup Connection programako aukeratuetako bat izan da. Hala, urrian CIC Boston zentrora joango da 6 hilabeteko azelerazio-prozesu batean parte hartzera. “Bostonen lortu nahi duguna da gure negozio-eredua kontrastatzea eta plataforma industrializatzeko eta saltzeko asmoa duten inbertitzaile eta agenteak prozesuan inplikaraztea” azaldu du Egoitz Astigarragak. Lantaldeko kideek diotenez, prozesuak aurreikusi bezala jarraitzen badu, analisi-sistema hori merkatuan egon liteke 2 urteren buruan.
IMG Pharma enpresa BIC Bizkaian dago. UPV/EHUko spin-off bat da, farmakoen analisi masiborako tresna berrien ikerketatik sortu zena 2010ean. Enpresa horrek garatzen duen teknologiak organo nahiz ehunetako mintz zelularrak isolatzen ditu analisiak egiteko. Teknika horrek aukera ematen du miniaturazko entseguak egiteko eta, ondorioz, murriztu egiten dira farmako berriak garatzeko denborak eta kostuak, animalia gutxiago erabiltzen da esperimentazio-prozesuetan eta hondakin kutsakor gutxiago sortzen da.
