2025-2030 aldiko Sare Elektrikoen Plangintza berriaren zirriborroak % 40 baino gehiago handitu du Euskadiko potentzia

• “Lan eta negoziazio handiko hilabeteak izan dira, eta gaur esan dezakegu Euskadik ezinbesteko konpromisoa lortu duela euskal industriarentzat: datozen bost urteetan aurrekaririk gabeko kopurua inbertituko da gure sare elektrikoetan, eta horrek % 40tik gorako potentzia handitzea ekarriko du”.
• Energia elektrikoaren hornidura bermatzeak euskal industriaren deskarbonizazio-prozesua azkartuko du, egungo industria-proiektuen ekoizteko ahalmena eta lehiakortasuna handituko ditu, eta industria berria sortzen eta Euskadira erakartzen lagunduko du
• Horrela, Eusko Jaurlaritzak irtenbidea emango dio euskal industriaren premia estrategikoari; izan ere, energia-kontsumoan intentsiboak diren eta deskarbonizazio-premia larriak dituzten 117 enpresa baino gehiagoren energia-eskaerari erantzun ahal izango zaio, eta horrek 70.000 lanpostu baino gehiago babestea ahalbidetuko du.
• Potentzia-handitze horrek erantzuna ematen dio, halaber, euskal industriari; izan ere, hazkunde- eta hedapen-planak ditu gaur egun, eta konexio edo entxufe berrien zain daude.
• Potentzia gehigarria % 40 baino gehiago handitzea lortzeko, eskatutako 20 azpiestazioetan egingo dira jarduketak, eta 4 azpiestazio berri sortuko dira.
• Datozen asteetan, Eusko Jaurlaritzako taldeek mahai teknikoan lanean jarraituko dute potentzia gehigarria lortzeko, hala atzerriko inbertsioak eta industria berria erakartzeko.

Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburua “oso pozik” agertu da Trantsizio Ekologikorako eta Erronka Demografikorako Ministerioak gaur aurkeztu duen plangintzaren zirriborroarekin. “Lan eta negoziazio handiko hilabeteak izan dira —adierazi du—, eta gaur esan dezakegu Euskadik ezinbesteko konpromisoa lortu duela euskal industriarentzat: datozen bost urteetan aurrekaririk gabeko kopurua inbertituko da gure sare elektrikoetan, eta horrek % 40tik gorako potentzia handitzea ekarriko du”.

 Sailburuaren hitzetan, proposamen honetan aurreikusitako jarduerek “aukera emango digute gure industria deskarbonizatzeko, gehiago hazteko eta Euskadira industria-inbertsio berriak erakartzeko. Hori da Euskadiren aurrerapena, aberastasuna eta ongizatea ziurtatzeko baldintza”. “Gure industriarentzat datozen urteetarako energia elektrikoaren hornikuntza bermatuta —nabarmendu du—, euskal ekonomiaren deskarbonizazio-prozesua azkartuko da epe luzera; hala, non industria lehentasunezkoa izango da, eta aukera emango du egungo industria-proiektuen ekoizteko ahalmena eta lehiakortasuna handitzeko eta Euskadin industria berria sortzen eta erakartzen laguntzeko”.

 “Datozen asteetan, Eusko Jaurlaritzako taldeek mahai teknikoan lanean jarraituko dute potentzia gehigarria lortzeko, hala atzerriko inbertsioak eta industria berria erakartzeko”, adierazi du Mikel Jauregik.

Plangintza hori Eusko Jaurlaritzak azken hilabeteetan maila guztietan Trantsizio Ekologikorako eta Erronka Demografikorako Ministerioarekin, Redeiarekin, Iberdrola Distribuciónekin eta CNMCrekin egindako lan handiaren emaitza da. Lan horren helburua izan da euskal industriaren premien xehetasunen berri ematea eta Euskadirentzat potentzia energetiko handiagoa lortzeko premia adieraztea.

Energia-kontsumoan intentsiboak diren eta premiazko beharrak dituzten 117 enpresari baino gehiagori laguntzea, 70.000 lanpostu baino gehiago babesteko

Helburu horrekin, Eusko Jaurlaritzak Estatuko erakundeekin batera lan egin du, 2025-2030 aldiko Garraio Sare Elektrikoen Plangintza berriak sare elektrikoaren gaitasun- eta arkitektura-beharrak jaso zitzan, elektrifikazioan aurrera egiteko, industria deskarbonizatzeko, industria-proiektuen garapena bultzatzeko, industria berria erakartzeko eta Euskadirentzat kalitateko eta ongizateko enplegua sortuko duten aukera berriak erakartzeko.

Datozen bost urteetarako Sare Elektrikoen Plangintza berrian hartutako konpromisoei esker, Eusko Jaurlaritzak identifikatu dituen deskarbonizazio-behar larriak dituzten 117 enpresaren energia-eskariari erantzun ahal izango zaio, eta 70.000 lanpostu baino gehiago babesten lagunduko du (zuzenak, zeharkakoak eta eragindakoak). Sektorerik kaltetuenak metalgintza, forjaketa eta galdaketa, beira eta ibilgailu motordunen fabrikazioa dira. Plangintza horri esker, beraz, Euskadiko industria-proiektu handien eta ETEen energia-beharrak ase daitezke.

Energia-potentzia handitzeak euskal industriaren deskarbonizazio-prozesua azkartuko du, egungo industria-proiektuen ekoizteko ahalmena eta lehiakortasuna handituko ditu, eta industria berria sortzen eta Euskadira erakartzen lagunduko du.

Potentzia-handitze horrek erantzuna ematen dio, halaber, euskal industriari; izan ere, hazkunde- eta hedapen-planak ditu gaur egun, eta konexio edo entxufe berrien zain daude.

Euskal industriaren energia-eskaeraren handitzea

Euskadiko elektrizitate-eskaera egonkorra izan da azken 20 urteetan, 12.000 MW-eko kapazitate elektrikoarekin, eta ez da inbertsio garrantzitsurik egin gero eta handiagoa den eskaerari erantzuteko.

Hala ere, gure industriaren deskarbonizazio-prozesuaren, egungo industria-proiektuak hedatzeko beharraren eta industria-enpresa berriak sortzearen eta erakartzearen ondorioz, 12.000 MW-eko kapazitate hori ez da inola ere nahikoa gure industriaren energia-potentzia handiagoaren eskaerari erantzuteko.

Kontuan izan behar da, Euskal Estatistika Erakundearen (EUSTAT) datuen arabera, industria-sektoreak eta zerbitzu aurreratuek Euskadiko BEGaren % 40 osatzen dutela, eta 200.000 lanpostu baino gehiago sortzen dituztela. Euskadiko industria elektrointentsiboa da, batez ere. Hori dela eta, Euskadik Estatu osoko industria-kontsumo elektrikoaren % 10 inguru erabiltzen du.

Industria hobetzeko lehentasunezko azpiestazioetan inbertitzea

Estatu mailako garraio elektrikoaren sarearen plangintza funtsezko faktorea da euskal sare elektrikoa optimizatzeko eta garapen berriak egiteko. Hori dela eta, Eusko Jaurlaritzak garraio-sareko 19 azpiestaziotan hobekuntzak eta egokitzapenak egiteko eskatu zion Espainiako Gobernuari. Azpiestazio horiek onartzeak deskarbonizatzeko eta enpresa berriak Euskadira erakartzeko epe labur eta ertaineko beharrei erantzutea ahalbidetuko luke. Eskatutako azpiestazio guztietatik 12 lehentasunezkotzat jotzen ziren, Araban Bizkaian eta Gipuzkoan, haien egokitzapenak inguruko gune eta industrietan izango zuen eraginagatik.

Estatu mailako garraio elektrikoaren sarearen plangintza funtsezko faktorea da euskal sare elektrikoa optimizatzeko eta garapen berriak egiteko. Hori dela eta, Eusko Jaurlaritzak garraio-sareko azpiestaziotan hobekuntzak eta egokitzapenak egiteko eskatu zion Espainiako Gobernuari. Azpiestazio horiek onartzeak deskarbonizatzeko eta enpresa berriak Euskadira erakartzeko epe labur eta ertaineko beharrei erantzutea ahalbidetuko luke.

Proposamen horiek Ministerioak aurkeztutako 2025-2030 aldiko Sare Elektrikoen Plangintzan jaso dira, eta 20 azpiestaziotako jarduketak jasotzen dituzte. Gainera, 4 azpiestazio berri gehitu dira, egungo sare elektrikoaren baldintzak hobetzeko.

Sailburuak adierazi duenez, “oso pozik gaude lortutakoarekin, baina ez gara konformatzen. Anbizio handiko helburuak ditugu industria berria erakartzeko, eta oraindik lan asko dugu talde teknikoekin egiteko. Datozen asteetan anbizio hori defendatzen jarraituko dugu Madrilen”.