Albisteak 19 iraila, 2025

IndeusBerri: Industria eta Euskararen plaza

Gaur albiste dira Arabako Enpresen Foroa, Emakume Zientzialarien argitan, Enpresa Digitalaren ikastaroa, Adimen Artifiziala eta PGP zifratze-sistema.

‘Adimen Artifizialak lagundutako kontroldun irudiak sortzea’ ikastaroa egingo du Enpresa Digitalak datorren astean Donostian. Ikastaro hau adimen artifizialeko irudiak modu erraz eta kontrolatuan sortzeko interesa duen edonorentzat diseinatuta dago, tresna irisgarriak erabiliz. Freepik AI Suiteren funtzio nagusiak ezagutu eta beren proiektuetan aplikatu nahi dituzten sortzaile, ekintzaile eta profesionalen beharrak aseko dituen prestakuntza praktiko gisa aurkezten da. Asmoa da AAk lagundutako irudien sorkuntzara oinarrizko hurbilketa bat eskaintzea, aurretik esperientziarik ez dutenek ere oinarriak ikasi eta beren konposizioak sortzen has daitezen.

‘Emakume Zientzialarien argitan’ solasaldi-zikloa irailaren 30ean hasiko da Maialen Araolazaren hitzaldiarekin. Donostia Kulturak eta Elhuyarrek antolatutako egitasmoak emakume zientzialariak ezagutzera ematea du helburu. Izan ere, zientziaren eta teknologiaren historian emakumeen ekarpenak ezkutuan geratu dira, eta gaur egun ere nabarmena da emakumeen kontrako diskriminazioa arlo horretan. Aurrez aurreko elkarrizketen bidez, hainbat arlotan lan egiten duten hiru emakume zientzialari ezagutzeko aukera izango da. Elkarrizketatzailea Ana Galarraga Aiestaran Elhuyarreko zientzia-dibulgatzailea izango da.

Hizkuntza irizpideak zehaztearen garrantziaz arituko dira Arabako Enpresen foroan, irailaren 23an. Arabako alor sozioekonomikoan euskara sustatzeko asmoz duela bost urte sortutako ekimena da Arabako Enpresen foroa, Eusko Jaurlaritzak, Arabako Foru Aldundiak eta Gasteizko Udalak sustatutakoa. Foroa Lanabes programa barruan kokatzen da, zeinak Arabako lurralde historikoan euskara lanean sustatzeko helburua duen. Arabako Enpresen foroaren aurtengo lehen topaketa joan den apirilaren 3an egin zen eta 40 enpresa eta eragile sozioekonomiko bildu ziren bertan.

“PGP zifratze-sistema” Industria Berriaren Spri Hiztegian. Datuen transmisioaren konfidentzialtasun kriptografikoa eta autentifikazioa ematen dituen enkriptatze-programa. Testuak, mezu elektronikoak, fitxategiak, direktorioak eta disko osoko partizioak sinatzeko, enkriptatzeko eta desenkriptatzeko erabiltzen da, baita posta elektroniko bidezko komunikazioen segurtasuna areagotzeko ere. Phil Zimmermannek garatu zuen 1991n.

‘Adimen artifizialaren argi-ilunak’ artikulua EnpresaBIDEAn egunkarian. Usue Mori Carrascalek sinatu duen artikulu hau ekarri dugu gaurko buletinera. Kobazulo batean bizi ez bazara, ziur azken urteetan gauza asko entzun dituzula adimen artifizialari buruz. Are gehiago, ia ziur esango nuke modu kontziente edo inkontzientean erabili duzula adimen artifiziala zure egunerokoan. Izan ere, adimen artifiziala ia alderdi guztietan txertatu da jada.

Lotutako albisteak

12/09/2025 Euskara industrian

Bilaketa iragazi

IndeusBerri: Industria eta Euskararen plaza

Lotutako albisteak