Eusko Jaurlaritzak BIND Corporateren 10. edizioko 74 startup finalistak iragarri ditu, 70 enpresa liderrekin elkarlanean aritzeko
Eusko Jaurlaritzaren berrikuntza irekiko plataformak, BIND plataformak, BIND Corporate programaren 10. edizioan parte hartuko duten 74 startup finalistak iragarri ditu, industriako enpresa liderrekin elkarlanean aritzeko. Parte-hartzaileak 2026ko urtarrilean jakinaraziko dira, eta edizio honetako 70 enpresa kideek hautatuko dituzte, industria adimentsuago, jasangarriago eta efizienteago batean lagunduko duten berrikuntza-proiektuak gara daitezen.
Industria, Trantsizio Energetiko eta Jasangarritasun Sailaren ekimenak, SPRIren bidez kudeatuko denak, startupei aukera ematen die benetako bezeroekin soluzioak baliozkotzeko eta puntako ekintzailetza- eta berrikuntza-ekosistema batean murgiltzeko, erreferentziazko bizkortze-programa baten bidez. Hautaketa-prozesuaren fase honetan, startupak aurrez aurre bilduko dira interesa duten enpresekin, 2026an garatuko dituzten proiektu potentzialen oinarriak finkatze aldera.
15 herrialdetako 74 startup
10. edizioko startup finalisten % 45 Espainiakoak dira. 21 Euskal Autonomia Erkidegokoak dira: 15 Gipuzkoakoak eta 6 Bizkaikoak. Eta beste 13 beste autonomia-erkidego batzuetatik datoz, hala nola Kataluniatik, Galiziatik, Nafarroatik, Madrildik eta Kantabriatik.
Nazioarteko startupen % 50 Europako herrialdeetatik datoz, hala nola Alemaniatik, Erresuma Batutik, Frantziatik, Finlandiatik eta Portugaldik. Eta gainerako % 5a Amerikakoak dira, zehazki Ameriketako Estatu Batuetakoak, Kanadakoak, Argentinakoak eta Mexikokoak.
Machine Learning eta Cleantech: 70 enpresa kideen joerak
BIND Corporateren 10. edizioa osatzen duten 70 enpresen artean beren sektoreetako liderrak daude, adibidez Petronor/Repsol, Talgo, Danobatgroup, Enagás, Arteche, Ormazabal, CAF, Vidrala, Faes Farma, Gureak eta Eroski. Enpresa kideek 12 erabilera-kasu hautatu zituzten, lau jarduketa-esparrutan: industria adimenduna; energia garbia eta jasangarria; osasunari aplikatutako teknologia; eta elikadurari aplikatutako teknologia.
Finalistek proposatzen dituzten proiektuek erabilera-kasu horiei heltzen diete, hau da, BINDen parte hartzen duten enpresek aurre egin beharreko erronkei. Aurkeztutako proiektu guztien % 14k industria-prozesuen digitalizazioaren eta trazabilitatearen erronkari heltzen diote. Beste % 12k efizientzia energetikoa eta kontsumoaren kudeaketa adimenduna bilatzen dute industrietan. Eta hirugarrenik, enpresa-informazioaren kudeaketarako eta segurtasunerako eta araudia betetzeko soluzioak daude, aurkeztutako proiektuen % 12rekin.
Proposamen teknologikoen artean, adimen artifiziala da —zehazki, machine learning eta ikusmen artifiziala— gehien aplikatzen denetako bat, eta hautagaitzen % 42an agertzen da. Bigarrenik, enpresaren energia eta jasangarritasuna kudeatzeko teknologiak daude, guztizkoaren % 25. Fase horretan, IoT, zibersegurtasuna eta robotika ere agertzen dira, eta startupen % 17k aplikatzen dute.
Finalistak Bilboko South Summit ekitaldian
74 startup finalistek South Summit Industry & Energy ekitaldian parte hartzeko aukera izango dute. Izan ere, networkingeko 2 eguneko ekitaldi horretan industria adimendunean, energian eta mugikortasunean erabakiak hartzeko liderrek eta arduradunek hartzen dute parte. Enpresa kideekin aurrez aurre biltzeaz gain, topaketa balia dezakete adituen hitzaldietara joateko eta sektoreko beste startup eta inbertitzaile batzuekin harremanetan jartzeko.
Hauek dira 10. edizioko 74 startup finalistak:
Adimen artifiziala
Clean Tech
Energy Tech
Konektagarritasuna eta IoT
Softwarea
Zibersegurtasuna
Robotika eta elektronika
Big Data
Computing
Beste batzuk
BIND
BIND plataforma Industria, Trantsizio Energetiko eta Jasangarritasun Sailak SPRI Taldearen bitartez sortutako berrikuntza ireki publiko-pribatuko plataforma da. BIND plataformak hiru ekimen ditu —BIND Corporate, BIND SME eta BIND GovTech—, Euskadiko enpresak, ETEak eta sozietate publikoak mundu osoko startup disruptiboekin konektatu eta berrikuntza-proiektuak garatzeko. Programa 2016. urtean hasi zenetik, 250 startup eta scaleup baino gehiago eta 350 proiektu baino gehiago bizkortu dira, eta 9,6 milioi euroko fakturazioa gainditu. Era berean, plataforma erreferente gisa posizionatu da sektorean, lurraldeko industriaren eta enpresa-sarearen digitalizazioan laguntzeagatik.
