Pepe Barreira, Begoña Castro eta Josean Murori emango dizkiete 2024ko Joxe Mari Korta sariak
- Sariak azaroaren 26an banatuko dira Donostian, Imanol Pradales lehendakaria buru izango duen ekitaldian.
- Joxe Mari Korta sariak 2000. urtean ezarri ziren, ETAk enpresari gipuzkoarra eta ADEGIko presidentea erail ondoren, eta Eusko Jaurlaritzak enpresa-arloan ematen duen sari gorena dira.
Eusko Jaurlaritzak, Industria, Trantsizio Energetiko eta Jasangarritasunaren Sailaren bitartez, Joxe Mari Korta Sariak ematen dizkie urtero beren bizitza- eta enpresa-ibilbideagatik nabarmentzen diren euskal enpresariei. Aurtengo edizioan —sariak ezarri zirenetik 24.a— honako hauek izango dira sarituak: José Barreira Lorenzo, SEA – Arabako Enpresak elkarteak proposatua; Begoña Castro Feo, CEBEK – Bizkaiko Enpresarien Konfederazioak aurkeztua; eta José Ángel Muro Zabaleta, ADEGI – Gipuzkoako Enpresen Elkarteak aurkeztua.
Industria, Trantsizio Energetiko eta Jasangarritasuneko sailburu Mikel Jauregi buru duen epaimahaiak nabarmendu nahi izan du saritutako pertsonen inplikazioa “beren jarduera profesionala garatu duten enpresa-sektoreetan, baita enpresa-balioen garapenean, enpresen sorkuntzan, jarduera eta lanpostu berrien sorreran duten garrantzia ere”.
Sari hauek ETAk 2000. urteko abuztuan erail zuen enpresari eta ADEGIko presidente Joxe Mari Kortaren izena daramate. Euskal ekosistema ekonomikoaren buru diren eta beren inbertsioen eta lanaren bidez enplegua eta aberastasuna sortzen duten pertsonen dohainak eta ahalegina publikoki aitortzeko ezarri ziren, elementu horiek gizarte osoaren onurarako baitira. Enpresen errotzea eta industria-sarearen hobetzea sustatzen duten pertsonak ere aintzatesten dituzte. 24. edizioan, sari hauek Eusko Jaurlaritzak enpresa arloan ematen duen sari gorena dira, eta azaroaren 26an Donostian egingo den eta Imanol Pradales lehendakaria buru izango duen ekitaldi batean banatuko dira.
Hautagaiak hiru lurralde historikoetako enpresa-elkarteek, merkataritza-erakundeek edo profesionalen elkargoek proposa ditzakete, bai eta Joxe Mari Kortaren Bidetik fundazioak eta Euskadin egoitza duten enpresek ere.
Pepe Barreira Lorenzo
José “Pepe” Barreira Lorenzok, bere izaera abenturazalea, bere esfortzua eta bere kemena ez den beste prestakuntzarik gabe, ibilbide profesional geldiezina osatzea lortu du. Haurtzaroan familiako artaldearekin ardi-artzain lana egiten hasi zen. 17 urterekin, Alemaniara emigratu zuen, eta peoi gisa aritu zen eraikuntzan eta lantegi batean. Itzuli zenean, Gasteizen finkatu zen, eta bertan, aldi berean, ostalaritzan eta garraioan aritu zen; ondoren, hainbat enpresa-ekimenen buru izan zen.
Gaur egun, kargu exekutiboak eta ordezkaritza-karguak ditu ostalaritzako eta jatetxeetako hainbat enpresatan, hala nola Gran Hotel Lakuan, Hotel Ruta de Europan, Gojain jatetxean eta Aurora Etxea erretegian; garraio- eta logistika-sektore integraleko hainbat enpresatan (Transportes Hombre Barreira, Tecnoaranda Logistic, Trailoba, Tubacex Logistic eta Grupo Saavedra); eta enpresa berritzaile eta teknologikoetan (Tecnoaranda, Haizea Wind Group eta Herdit).
Azken urteotan, bere ibilbide profesionala bermatzen duten hainbat sari jaso ditu, hala nola, enpresari gisa egindako ibilbide profesional osoa aitortzen duen Arabako Enpresari Gazteen Elkarteak (AJEBASK) emandako 2018ko Saria, Araba Emprende-k emandako 2018ko Ekintzaile Handien Saria eta ATAk (Langile Autonomoen Elkarteak) emandako 2013ko Urteko Langile Autonomoaren Saria.
Begoña Castro Feo
Begoña Castro Feo Biologia Zientzietan doktorea da Euskal Herriko Unibertsitatean eta Histocell enpresaren bazkide fundatzailea 2004. urtean; enpresa, gaur egun, Medikuntza Birsortzailean nazioarteko erreferente da. Zuzendari zientifiko postua betetzen du, eta konpainiaren egungo produktuak —zelula-terapiako sendagaiak eta zauriak orbaintzera eta larruazala lehengoratzera bideratutako osasun-produktuen lerroa— sortu dituzten ikerketa-ildoen garapena zuzendu du.
Begoña Castroren helburu nagusia izan da Histocellen garatutako teknologiak, ebatzi gabeko behar medikoetara bideratuak, benetan pazientearengana iristea. Hori dela eta, hainbat teknologia aplikatu dira jada bizkarrezur-muineko lesio akutua, arnas-distres akutua edo zauriak eta orbaintze zaileko ultzerak dituzten pazienteetan.
Euskal Herriko “Emprendedor XXI” sariaren irabazlea eta Nazio-mailan finalista 2009an. CIBER-BBNko (Bioingeniaritza, Biomaterial eta Nanomedikuntza Sareko Ikerketa Biomedikoko Zentroa) Batzorde Zientifiko Aholkulariko kidea 2012tik, eta NANBIOSIS azpiegitura zientifiko tekniko berezikoa (ICTS) —abangoardiako soluzio biomedikoak eskaintzen ditu 2016tik—.
José Ángel Muro Zabaleta
José Ángel “Josean” Muro Zabaleta Ekonomia eta Enpresa Zientzietan lizentziaduna da Deustuko Unibertsitatean, eta 1988tik Ikaztegietako Ezarri enpresan bertan garatu zuen bere lehen sei urteko ibilbide profesionala, esportazio-arduradun gisa. 1994an proiektu batean sartu zen. Proiektua, hasieratik, esportatzeko asmoarekin sortu zen; izan ere, Ezarri erreferentzia da 80ko hamarkadatik Frantziako merkatuan. Ordutik aurrera, Europako, Ekialde Ertaineko, Afrika Iparraldeko eta Latinoamerikako beste herrialde askok jarraitu dute, mosaikoen fabrikazioan erreferente bihurtu arte nazioartean.
XXI. mendearen hasierak Ezarri enpresaren instalazio produktibo guztiak berritzea ekarri zuen; I+G+b eta diseinu sailak sortu ziren, baita biltegi automatikoa ere. Hori enpresarentzat funtsezko inbertsioa izan da stock-eko erreferentzien % 95 izateko eta bezeroei premium zerbitzua emateko.
2020an, eta gure enpresak errotzeko prozesu eredugarri batean, Ezarri INZU Group taldearen parte izatera igaro zen. INZU Group nazioartean izen handiko industria-taldea da, eta hainbat sektore barne hartzen dituzten konpainia oso espezializatuek osatzen dute. Bere enpresa-ibilbidean, Josean Muro inor gutxi bezala egon da inplikatuta, besteak beste, ADEGIren edo Elkargiren gobernu-organoetan. Azpimarratzekoa da haren kemena eta lurraldearekiko konpromisoa, baita enpresa nazioartean erreferentzia bihurtu duten balioen definizioan eta haiekiko fideltasunean izan duen protagonismoa ere.
Lotutako albisteak
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa
UNIREn bigarren edizioak 80 enpresa baino gehiago bildu ditu FICOBAn
Soldaduran eta beste lotura-teknologietan espezializatutako Estatuko azoka bakarra da
Euskadik Europan herrialde berritzaile gisa duen ahala finkatu du, enpresa txiki eta ertainen ahaleginari esker
Topaketak lurraldeko eta sektoreko berrikuntzaren 30 eragile eta Euskadiko 70 enpresa txiki eta ertain baino gehiago bildu ditu; eragile eta enpresa horiek 2023an berrikuntza-proiektu bat garatu dute HAZINNOVAren bidez, SPRIk eta Innobasque, Berrikuntzaren Euskal Agentziak kudeatutako Eusko Jaurlaritzaren programaren bidez
Soldaduraren balio-kateari buruzko azokaren, UNIREren, bigarren edizioa egingo dute Ficoban
Sektore horrek Estatu osoan egiten duen kongresu bakarra martxoaren 18 eta 19an izango da
Diker, osasungintzaren sektorerako injekzio bidezko plastikoetan Euskadi mailako erreferente bihurtu nahi duen ETEa
Oiartzungo enpresa, gaur egun, batez ere automobilgintzaren eta elektronikaren sektorearentzat ari da lanean