BCBL-k klinika berria sortu du hizkuntza nahasteen diagnostiko aurreratua egiteko
BCBL —Basque Center on Cognition, Brain and Language— zentroak, Hezkuntza sailaren baitan, Neure Clinic zabaldu du, Euskadin ikerketa- eta bikaintasun-zentro batek sustatutako lehen klinika
Klinikaren irekitzea BCBL-ren hamargarren urteurrenarekin batera ospatuko da. Hamar urte hauetan zehar, zentro donostiarra neurozientzia eta hizkuntza nahasteen inguruko nazioarteko erreferentzia-zentro bezala sendotu da
Inaugurazio-ekitaldia gaur ospatu da Donostian, Eusko Jaurlaritzako Hezkuntza sailburua den Cristina Uriarte eta Ekonomia Sustapena, Landa Ingurunea eta Lurralde Orekako Foru Diputatua den Ainhoa Aizpururen aurrean
Basque Center on Cognition, Brain and Language (BCBL) zentroak gaur zabaldu du ofizialki Neure Clinic, diagnostiko goiztiarrerako klinika. Donostian kokaturiko zentroaren helburu nagusia dislexia, adierazpen hizkuntzaren arazo espezifikoa (AHAE) eta afasiaren inguruko nahasteen ebaluazio eta diagnostiko zehatzak eskaintzea da.
Gaur arratsaldean BCBL-ko instalazioetan ospatu den inaugurazio-ekitaldian Eusko Jaurlaritzako Hezkuntza sailburua den Cristina Uriartek eta Ekonomia Sustapena, Landa Ingurunea eta Lurralde Orekako Foru Diputatua den Ainhoa Aizpuruk parte hartu dute.
Ekitaldian BCBL-ko kide fundatzaile diren Eusko Jaurlaritza, Ikerbasque, Innobasque Gipuzkoako Foru Aldundia eta Euskal Herriko Unibertsitateko (UPV/EHU) hainbat ordezkariez gain, hizkuntza nahasteak dituzten umeen eta hauen senideek osatutako elkarteen bozeramaileek parte hartu dute. Elkarte horien artean TEL Euskadi da aipagarri, dohaintza bati esker klinika sortzen laguntzeagatik. Elkarte honek, beste zenbaiten artean, Neure Clinic-en garapena gertutik ezagutzeko aukera izan du.
«Gaur irekitzen den klinikak oso asmo handia du: Euskadi- zein estatu-mailan erreferentzia bihurtzea. Azken urteotan BCBL-n garatu den ikerkuntza lanari esker, Neure-ko taldeak ebaluazio neuropsikologiko osoak burutu ahal izango ditu, haur bakoitzari egokitutako esku-hartze planak diseinatzeko oinarrizkoak izango direnak», adierazi du gaur BCBL-ko zuzendaria den Manuel Carreirasek.
«Gure jomuga Neure Clinic-en bidez logopeda eta terapeutei diagnostiko zehatzak egiten laguntzea da, nahaste ezberdinak dituzten pertsonak tratatzeko hainbat jarraibide eskaintzeaz gain», esplikatu du Nekane Galparsorok, klinikaren arduradunak.
Zentzu berean, Cristina Uriarte Hezkuntza sailburuak, ikerkuntzak gizarteari egiten dion ekarpena azpimarratu nahi izan du: “BCBLn azken urteetan lortutako jakintza eta esperientzia guztia gure gizartearen esku jarriko da klinika berri honen bitartez. Eta gauza gutxi izango dira ume hauei laguntzea baino ederragoak. (…) Eusko Jaurlaritzak ikerkuntzaren aldeko apustu irmoa egin du azken urteetan, eta bide beretik jarraituko dugu, gizarteak horrela eskatzen digulako”.
Ezagutza transferentzia
Neure Clinic BCBL zentroko ezagutzaren transferentzia sustatzeko sortu zen, garatutako ikerketak gizarteari helarazi eta, bestalde, hizkuntza, ikaskuntza eta garapenaren ebaluazio eta diagnostiko goiztiarra egiteko zerbitzua merkatuan sarrarazteko xedez.
Zentzu honetan, klinikaren oinarrizko lana logopedia eta terapeuten kontsultategiei laguntzea izango da, kognizioa, sozioemozioak eta hizkuntzaren inguruko aspektuen ebaluazio neuropsikologiko eta logopediko aurreratuak eskainiz.
Hori dela eta, Neure Clinic-ek BCBL-ko ikertzaileen azken aurkikuntzak jasotzen dituzten ebaluazio-metodo aitzindariak erabiltzen ditu, gaztelania zein euskararen kasuan ematen diren hizkuntza-arazoen edozein aspektu neurtzeko balio dutenak. Aldi berean, bildutako datuak nahaste ezberdinen inguruko ezagutza zientifikoan aurrera egiten lagunduko duen datu-basera gehituko dira.
10 urtez burmuinaren sekretuak ikertzen
Klinikaren zabaltzea zentro donostiarraren hamargarren urteurrenarekin batera ospatuko da. BCBL, hamar urteko ibilbidean zehar, neurozientzia eta hizkuntza nahasteak ikertuz nazioarteko erreferentzia-zentro bezala sendotu da.
Honen seinale azken hamarkadan lortutako emaitzak dira: Zentroan azken hamarkadan lan egin duten 25 herritartasun ezberdineko 400 ikertzaile baino gehiagok zientzia-agerkari ospetsuetan 450 artikulutik gora argitaratu eta hogei bat biltzar antolatu dituzte. Gainera, 75 finantzabide eta 120 ikerketa-beka lortu dituzte, 30.000 boluntariok parte hartu dute zentroko ikerketetan eta 25 milioi eurotik gorako itzulkin ekonomikoa eskuratu dute, batez beste ia % 65-ekoa autofinantzatzera iritsiz.
Honenbestez, BCBL neurozientzia kognitiboaren arloko erreferentzia-zentro bezala irmotu da, ZTBP-ren helburuekin bat eginez. Modu honetan, Eusko Jaurlaritzaren politika zientifikoaren garapenerako ezarritako lehentasunei jarraiki, zientzia, teknologia eta berrikuntzaren erabilpena bultzatu eta errazten du, enpresa-sarearen lehiakortasuna eta euskal gizartearen garapena hobetuz.
BCBL-ri buruz
Basque Center on Cognition, Brain and Language nazioarteko diziplina arteko ikerketa zentroa da. Donostian kokatuta dagoen zentro honek, Eusko Jaurlaritzaren laguntzarekin, kognizioa, burmuina eta hizkuntza ikertzen ditu Euskadin zientzia eta ikerketa sustatze aldera. BCBL BERC zentroetako bat da (Basque Excellence Research Center), Zientzia, Teknologia eta Berrikuntzaren Euskal Sarearen (ZTBES) barruan dago eta Ikerbasque, Innobasque, Gipuzkoako Aldundia eta Euskal Herriko Unibertsitatea (UPV/EHU) dira haren kideak.
Horrez gain, 2016. Urtean «Severo Ochoa» bikaintasun-akreditazio ospetsua lortu zuen zentro honek 3 ikerketa-lerrotan oinarritzen du bere aktibitatea: Hizkuntza, irakurketa eta garapen arazoak; Eleaniztasuna eta bigarren hizkuntzak ikastea; Neurodegenerazioa, burmuinaren kaltetzea eta zahartze osasuntsua.
Lotutako albisteak
ETEentzako produktuen eta prozesuen berrikuntza babesten dugu Hazinnovarekin
Hazinnova euskal ETE-ei doako aholkularitza eskaintzen dien programa da, produktu eta prozesuetan berrikuntza-mikroproiektuak bultza ditzaten. Eska ezazu 2025eko maitzaren 6tik urriaren 29ra.
Eusko Jaurlaritzak startup disruptiboen talentua eskuratzeko aukera emango die EAEko ETEei
SPRIk BIND SMEren 5. edizioa ireki du, EAEko ETEek startup berritzaileekin elkarlanean jardun eta haien lehiakortasuna hobetzeko. Deialdia uztailaren 4ra arte egongo da zabalik. Hautatutako ETEek teknologia disruptiboetara eta talentu berritzailera sarbidea izango dute, IA, jasangarritasuna edo Smart Factory bezalako arloetan soluzioak garatzeko.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Zinemaldia Startup Challenge 2025
Izen-ematea: apirilaren 15etik ekainaren 2ra arte
Sei euskal ikerketa-erakundek bat egin dute ITTHACAn zahartze osasuntsua sustatzeko
Elkartek programak finantzatutako proiektu honek biomarkatzaileak, iragarpen-ereduak eta osasunaren zuzeneko monitorizazioa erabiltzen ditu.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
Industriarako soluzio teknologiko aurreratuen garapenean erreferentea den ULMA kooperatiba taldea bisitatu du Mikel Jauregi sailburuak
Oil&Gaseko negoziorako brida homologatuen fabrikazioan munduko liderra den ULMA Forged Solutionsen lantegi nagusian ibili da eta "ziurgabetasuna nagusi den une honetan, ULMA kooperatiba-taldea industriaren, inbertsioaren, berrikuntzaren eta kalitatezko enpleguaren aldeko apustua nabarmena egiten ari da" nabarmendu du
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Wake Up! Albiste ekintzaile batzuk sarean 250324
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.