BIND 4.0ko 65 partner enpresek 79 startup aukeratu dituzte seigarren edizioko finalistak izateko

Aukeratutako 28 EAEkoak dira, 19 espainiarrak eta 32 nazioartekoak.

Partner enpresek interes berezia erakutsi dute sortzen ari diren teknologia berriekiko, hala nola hidrogenoaren mugikortasuna, hondakinen kudeaketa, energiaren ekoizpena eta biltegiratzea, blockchain edo e-mobility.

BIND 4.0 berrikuntza irekiko plataformak seigarren edizioko 79 startup finalisten zerrenda argitaratu berri du, enpresa handien eta startup berritzaileen arteko lankidetzaren bidez industriaren digitalizazioa bultzatzen jarraitzeko helburuarekin.  2022ko urtarrilean jakinaraziko dira Ekonomiaren Garapen, Jasangarritasun eta Ingurumen Sailaren ekimen publiko-pribatu honetako parte-hartzaileak, SPRI Taldearen eta bere UpEuskadi plataformaren bitartez.

Zehazki, BIND 4.0ko 65 partner enpresek 79 finalista hautatu dituzte, hau da, azken fasera igaro den startup kopuru handiena, aurreko bost edizioekin alderatuta. Errekor berri horrek, alde batetik, 4.0 industriaren etorkizuna bultzatzeko erreferentziazko ekimen gisa BIND 4.0 kokatzen jarraitzen du, eta, bestetik, startupen interesa eta enpresa handiek berrikuntza-plataformari ematen dioten laguntza sendotzen ditu.

4.0 industriaren etorkizuna markatuko duten teknologiak

Seigarren edizio honetako finalistak 772 hautagaitza baino gehiagoren artean aukeratu dira, eta gehienek —% 61— adimen artifizial eta big data, IoT eta errealitate birtual edo areagotuko soluzioak aplikatzen dituzte. Hala ere, berrikuntza gisa, aurten partnerrek interes berezia erakutsi dute sortzen ari diren soluzioekiko, 4.0 industriaren erronkei erantzuteko modu berri gisa. Horregatik, finalisten artean sektorearen etorkizuna markatuko duten soluzio disruptibo berriak daude, hala nola: hidrogenoaren mugikortasuna, hondakinen kudeaketa, energiaren ekoizpena eta biltegiratzea, blockchain edo e-mobility.

Startupetako teknologia horiek ezarriko dira industria adimendunaren, energia garbi eta jasangarriaren, elikaduraren eta osasunaren esparruetan proiektu berriak garatzeko, BIND 4.0ko partnerren eskutik; horiek joera bihurtuko dira 2022an.

Jatorriari dagokionez, edizio honetako finalistak 18 herrialdetakoak dira; horietatik 28 Euskal Autonomia Erkidegokoak dira, 19 espainiarrak (Katalunia, Galizia, Murtzia eta Madril, besteak beste), eta 32 nazioartekoak —Alemania, Finlandia eta Frantzia dira ordezkaritza handiena duten herrialdeak; ondoren, Estatu Batuak, Turkia, Suitza, Irlanda eta Portugal daude, besteak beste—.

65 partner enpresa, berrikuntzaren buru

BIND 4.0ren erakargarritasun nagusietako bat da plataforman parte hartzen duten partner enpresen kopuru handia.  Seigarren edizio honi 10 kide berri gehitu behar zaizkio: Arteche, Celsa Group, Cofares, Hitachi Energy, Erreka Group, Onnera Group, Osakidetza, P4Q Electronics, Ramondin, eta Suez Treatment Solutions. Jada programan dauden enpresekin bat egiten duten konpainia handiak, hala nola: Angulas Aguinaga, CIE Automotive, Sarralle, Sidenor, Iberdrola, Orona, Faes Farma edo ITP Aero, besteak beste.

2016an sortu zenetik, BIND 4.0k munduko toki guztietatik datozen startup teknologikoen interesa erakartzea lortu du. Euren helburu nagusia da erreferentziazko bezeroen eskutik merkatura azkarrago iristea, eta, aldi berean, Euskal Autonomia Erkidegoko enpresen berrikuntza eta eraldaketa digitala sustatzea, startupekin batera lanean jardunez.

BIND 4.0REN SEIGARREN EDIZIOKO FINALISTEN ZERRENDA

Adimen artifiziala eta Big Data

Fabrikazio gehigarria

Robotika Kolaboratiboa

Informatika

Zibersegurtasuna

IoT

Errealitate birtuala eta areagotua

Gailu medikoak

Energia ekoiztea eta biltegiratzea

Nanoteknologia/Material Berriak

Bestelako teknologiak

BIND 4.0-ri buruz

BIND 4.0 industria adimendunaren berrikuntza ireki publiko-pribatuko plataforma bat da, Eusko Jaurlaritzako Ekonomiaren Garapen, Jasangarritasun eta Ingurumen Sailak sortua, SPRI Taldearen eta Euskal Autonomia Erkidegoko ekintzailetzaren ekosistemaren UpEuskadi plataformaren bitartez. Gaur egun, Euskal Autonomia Erkidegoan egoitza duten erreferentziazko enpresa nagusi globaletako 65en lankidetza du. Ekimen honen helburua da industriaren eraldaketa digitala bultzatzea eta, aldi berean, ekimen berritzaileen sendotzea bizkortzea, enpresa handien eta startupen arteko lankidetza-eredu baten bidez. 2016. urteaz geroztik, BIND 4.0k 200 proiektu bizkortu ditu guztira. Proiektu horiek 130 startupek baino gehiagok garatu dituzte egindako bost edizioetan.

Lotutako albisteak

6 maiatza, 2024 Ekintzailetza

SPRIk startupekin berritzearen onurak proposatu dizkie ETEei BIND SME programaren bidez

Irakurri gehiago

6 maiatza, 2024 Ekintzailetza

Eraldalan martxan da Gipuzkoan, lidergo eta erakunde eraldaketa programa

Irakurri gehiago

5 maiatza, 2024 Ekintzailetza

Lx Revek enpresen eraldaketa digitala bizkortzen laguntzen du

Irakurri gehiago

3 maiatza, 2024 Ekintzailetza

KABIA, zure proiektuari hegoak emateko Ekintzailetza Komunitatea

Irakurri gehiago

3 maiatza, 2024 Ekintzailetza

Wake Up! Albiste ekintzaile batzuk sarean

Irakurri gehiago

Joan blog-era