Global Innovation Day, berrikuntza sustatzeko nazioarteko azken joeren eta jardunbide oneren erakustokia

Iñigo Urkullu lehendakaria, ekitaldian.

Berrikuntza bere adar guztietan (politika publikoak, kasu praktikoak, laguntza-programak, nazioarteko erreferenteak…) izan da Global Innovation Day 2021 ekimenaren ardatza. Berrikuntzaren Euskal Agentzia, Innobasquek antolatuta, ekitaldia gaur egin da, Barakaldoko BEC! Bilbao Exhibition Centren. Bertan, punta-puntako enpresa-ekosistemaren kideak bildu dira, honako lelo honekin: “Euskal berrikuntza martxan dago”.

Aurten Dani Álvarez kazetariak gidatutako zuzeneko telebista-programaren formatu dinamikoa izan duen jardunaldiaren inaugurazioan, Manuel Salaverria Innobasqueko presidenteak azpimarratu du digitalizazioaz, ingurumen-jasangarritasunaz eta osasunaz gain, pandemiak Covid osteko berrikuntza-olatua eragin duela, Industria Laugarren Iraultzaren azelerazioa, eta agerian utzi duela lankidetza publiko-pribatuaren garrantzia. Ingurune horretan, enpresa askok identifikatu dituzte erronkak eta aukerak, eta berrikuntza funtsezkoa da erronka eta aukera horiei aurre egiteko, birkokatzeko. Halaber, egiaztatu du Euskadiko berrikuntza-maila handitzeko joera argi dagoela, eta ETEen berrikuntza dela heldu beharreko erronka nagusia. Ildo horretan, gaineratu du Innobasque enpresa txiki eta ertainen alderdi hori bultzatzen ari dala, eta administrazioekin berrikuntza-politiketan lanean jarraituko duela, joerak eta esperientziak aztertuz eta Euskadiko berrikuntzaren egoera aztertuz eta neurtuz.

Aquadat, Dbus, Zero Zabor Fundazioa, Mondragon Componentes, Satlantis eta Sidenor erakundeek gidatutako kasuak izan dira ekitaldiaren lehenengo zatiaren protagonistak. Sei kasu horiek eta Global Innovation Day jardunaldian aurkeztutako beste batzuek Euskadiko lurralde historikoak, hiru hiriburuak eta hainbat udalerri zeharkatuko dituzte hurrengo asteetan, adibide eta inspirazio gisa baliagarriak izateko xedearekin.

Jarraian, Finlandia eta Austria “Etorkizuneko elkarrizketak: berrikuntza-joerak Euskadin eta Europan” mahaiaren erdigunea izan dira. Bertan, hiru herrialdeek beren enpresen jarduera modu arrakastatsuan sustatzeko bideari buruzko jardunbideak aztertu eta ezagutu dira.

Finlandia herrialde liderra da Europako Batzordearen 2021eko berrikuntza-adierazleen koadroaren arabera, eta azken urteotan Austria nabarmendu da enpresako I+Gn egindako inbertsioa asko handitu duelako.

Global Innovation Day ekimenaren hamargarren edizio honetako solasaldian, politika publikoen eta berrikuntza-programen joera garrantzitsuenak nabarmendu dira. Beatriz Mahieu Technopolis Taldeko bazkideak 20 urteko esperientzia du eskualdeko, estatuko eta EBko berrikuntza- eta ikerketa-politiken aholkularitzan, eta Finlandiak lortutako emaitza onak aipatu ditu, ikuspegi proaktibo-selektiboa eta berrikuntza-bonuen bidezko nazioartekotzearen babesa konbinatuta. Halaber, Mahieuk Austriari dagokionez azpimarratu du ezinbestekoa dela gobernuek aukerak ematea, ez bakarrik garapen eta berrikuntzako inbertsioak handitzeko, arrisku-kapitalaren, kontratazio publikoen edo zerga-pizgarrien bidez, baizik eta dauden gaitasunak eta aktiboak hobeto aprobetxatzeko eta ustiatzeko, eta, adibidez, dauden teknologia-garapenetarako aplikazio eta merkatu berriak aurkitzeko.

Horrez gain, elkarrizketan honako hauek parte hartu dute: Iñaki Garmendia, Ega Masterreko Industria-zuzendaria; Pello Rodriguez, Danobatgroup kooperatibako zuzendari nagusia; Ivan Marten, Orkestra, Lehiakortasunerako Euskal Institutuko presidentea; eta Leire Bilbao, Innobasque Berrikuntzaren Euskal Agentziako zuzendari nagusia.

Itxiera zirraragarria

Global Innovation Day berrikuntzaren soinu-bandaren sormenaren lekuko izan da. Fernando Velázquez Getxoko konpositoreak zuzenean konposatu eta interpretatu du partitura hori, jarduera berritzailearen hitzordu honi amaiera emateko.

Iñigo Urkullu Renteria lehendakariak itxi du ekitaldia, eta Euskadiko Zientziaren, Teknologiaren eta Berrikuntzaren XXI. Astea inauguratu du. Euskadik berrikuntzarekin eta ezagutzan oinarritutako gizartearekin duen konpromisoa berresteko, Zientzia, Teknologia eta Berrikuntzarako Euskal Kontseiluko kideak bertaratu dira ekitaldira. Organo hori da Jaurlaritzaren aholkularitza-organoa gai horietan, eta honako hauek osatzen dute: lehendakariak, buru gisa; Ogasun, Ekonomiaren Garapen, Ingurumen eta Jasangarritasun, Hezkuntza eta Unibertsitate, Osasun, Lurralde Plangintza eta Etxebizitza, eta Kultura eta Hizkuntza Politikako sailburuek; Zientzia, Teknologia eta Berrikuntzako batzordekideek; hiru ahaldun nagusiek; Mondragon Unibertsitateko, Deustuko Unibertsitateko eta UPV/EHUko errektoreek; BRTA, Neiker eta DIPC (Donostia International Phisics Center) eta Ikerbasque erakundeetako zuzendariek; Jakiunde eta Innobasque Berrikuntzaren Euskal Agentziako presidenteek; eta Euskadiko lau enpresa eragiletako (Danobatgroup, FaesFarma, Global Dominion Access eta Arteche Taldea) zuzendariek.

Lotutako albisteak

15 maiatza, 2024 Berrikuntza

Saizarlan, kartoizko kaxen plastikozko heldulekuak biodegradagarriak izateko proiektu berritzailea garatzen ari den ETEa

Irakurri gehiago

15 maiatza, 2024 Berrikuntza

Lan-Flaten doitasun handiko granitozko neurketa-ekipamenduak garatzen dira

Irakurri gehiago

14 maiatza, 2024 Berrikuntza

Sustatu berrikuntza-proiektuak zure enpresan Fast Track Innobideak ekimenarekin

Irakurri gehiago

8 maiatza, 2024 Berrikuntza

Innoledge, berrasmatzea eta egokitzea nortasun-ezaugarri gisa

Irakurri gehiago

6 maiatza, 2024 Berrikuntza

SPRI Taldeak ADR Foroaren bileran parte hartu du Ceutan

Irakurri gehiago

Joan blog-era