Kimet: “Futbolerako metodologia propioa duen lehen aplikazioa sortu dugu”

 

Euskadiko enpresak kirol horretan espezializatutako aholkularitza eta trebakuntza eskaintzen du.

Futbolerako entrenatzeko metodo propio batean oinarritutako lehen aplikazio adimenduna da Kimet Planning, eta kirol horretan jardutearekin erlazionatutako alderdi guztiak hartzen ditu barruan. Are gehiago, Espainiako Futbol Ligako tresna informatiko metodologiko ofiziala da, eta mundu osoko entrenatzaile ez-profesionalek nahiz Estatu Batuetako, Txinako edo Emirerri Batuetako federazioek erabiltzen dute. Kimet Sport, Bizkaian 2011n sortutako enpresa txikia, da sortzailea.

Gari Fullaondo da Kimet-en CEOa eta metodologiaren ideologoa. Futbolaren munduan hiru hamarkadatan pilatutako esperientziari esker sortu zuen metodoa. Alvaro Bilbao eta Zunbeltz Fullaondo enpresaren beste bi sortzaileekin batera, Bilboko Athletic Cluben aplikatu zuen metodo hori, metodologiaren zuzendari gisa lanean aritu zenean. Han izandako esperientzia oinarritzat hartuta, Kimet Planning aplikazio informatikoa garatzen hasi ziren.

“Metodologia aplikatzeko eta entrenamendu-plan bat finkatzeko alderdi guztiak definitzen dituen tresna adimenduna sortu genuen” azaldu du Gari Fullaondok. “Hala, futbolariak entrenatzen ari den edozeinek erabil dezake lan-tresna gisa, eta bere errealitatera egokitu dezake”. Taldearen adinaren eta mailaren araberako aldagaiak sartu eta gero, sistemak denboraldi osorako ariketa-plan osoa egiten du, lortu nahi diren helburuen arabera.

Lehen mailetako entrenatzaileentzat nahiz metodologia propiorik ez duten entrenatzaile erdi-profesionalentzat dago diseinatuta aplikazioa. Gainera,  beste funtzionalitate batzuk ere eskaintzen ditu lan-tresnak, besteak beste alderdi hauek kontrolatzeko: lehiaketaren bilakaera, mediku-kontrola, banakako eta taldekako txostenak eta entrenamenduei lotutako kudeaketa administratiboak.

Kimet Sport-ek Estatu Batuetan du proiektu nagusi bat, U.S. Club Soccer-ekin sinatutako hitzarmen bati esker lortutakoa, eta Txinako gobernuarekin ere beste proiektu bat jarri dute martxan, metodologia eskolatan ezartzeko. Nazioarteko lehen mailako hainbat klubek erabiltzen badute ere, entrenatzaile ez-profesionalek erabiltzen dituzte haien lizentzien ia % 95.

SoSa Tel Aviv-en azelerazio-programan parte hartzeko hautatu dituzten sei startupetako bat izan da Kimet Sport, eta SoSak Bizkaiko Foru Aldundiarekin duen hitzarmenari esker parte hartuko du programa horretan. Enpresaren oihartzuna hedatzeko aukera bat da prozesu hori. “Gure produktuak dagoeneko egonkortasun apur bat ematen digunez, orain egitura sendoago bat eraiki nahi dugu nazioarteko kolaboratzaileen eta hornitzaileen bidez, proiektuaren eskala handitzeko” azaldu du Gari Fullaondok. “Balio handia eman ahal izango diguten aliantza teknologikoak bilatzen lagunduko digu Israelgo egonaldiak”.

Lotutako albisteak

26 apirila, 2024 Digitalizazioa

Telekomunikazioen, zibersegurtasunaren eta cloudaren arloko berritasunak erakutsiko dituzte maiatzean 130 enpresak baino gehiagok

Irakurri gehiago

26 apirila, 2024 Digitalizazioa

Kaytek, digitalizazio industriala iraultzen ari den Barakaldoko startupa

Irakurri gehiago

26 apirila, 2024 Digitalizazioa

Gastuen kontroletik hasi eta fakturen digitalizaziora arte, klik batera Sabbatic-en soluzioekin

Irakurri gehiago

24 apirila, 2024 Digitalizazioa

114 enpresak hartu dute parte Euskadiko industriaren digitalizazioa sustatzeko kongresuan

Irakurri gehiago

23 apirila, 2024 Digitalizazioa

SPRIk Hannover Messe 2024 azokan dauden Euskadiko enpresei lagunduko die

Irakurri gehiago

Joan blog-era