LCyberCyberIndustry Congressen lehen edizioan nazioarteko zibersegurtasuneko 320 aditu baino gehiago bilduko dira, 200 enpresatakoak, zibersegurtasunak euskal industrian dituen erronkak eztabaidatzeko

Zibersegurtasuna funtsezko teknologia bihurtu da Euskadin, bertako sektore estrategikoak gero eta digitalizatuagoak eta konektatuagoak daudelako. Euskadiko ehun teknologikoa sendoa da, bereziki funtsezko sektoreetan, hala nola industrian, energian, osasunean eta, orain, baita industria aeroespazialean ere. Sektore horiek guztiek zibersegurtasuneko soluzio aurreratuak behar dituzte lehiakortasuna, osotasuna eta erresilientzia bermatzeko.

Euskadiko ekonomiarako, funtsezkoa da eskaintza teknologiko espezializatua eta sektore estrategikoen eskakizun zehatzak lotzea. Hori da CyberIndustry Congressen lehen edizioaren helburua. TECNALIAk antolatu du kongresua, eta SPRIk lagundu dio diseinatzen eta hedatzen Enpresa Digitala zerbitzuaren bidez, zeinak TECNALIAn baitu egoitza, hain zuzen. Bilbon egingo da, Azkuna Zentroan, ekainaren 17an eta 18an, eta nazioarteko hizlariek hartuko dute parte, zibersegurtasun industrialeko erronkei eta soluzioei buruzko eztabaida aberasteko eta ikuspegi globalez hornitzeko. 200 enpresatako 320 lagun baino gehiago izango dira. Aipatzekoa da, halaber, Zibersegurtasunaren Euskal Agentziako (Cyberzaintza) ordezkari bat ere izango dela kongresuan.

Edizio honen helburua da urtean behingo erreferentziazko topagune bihurtzea zibersegurtasunaren balio-kate osoarentzat, bai Euskadin, bai nazioartean. Ekitaldiak, ezagutza aurreratuak eta networking espezializatua eskaintzeaz gain, Euskadi zibersegurtasuneko lehen mailako erreferentzia gisa sendotzen lagunduko du ekitaldi horrek; era horretan, bertako industria-sarea indartuko du eta Euskadiren lehiakortasun teknologikoa eta ekonomikoa bultzatuko.

 Hizlariak eta gaiak

CyberIndustryn izango dira azken erabiltzaile diren enpresak, hornitzaile teknologikoak, ikerketa-zentroak, unibertsitateak eta eragile instituzional eta sektorialak, eta haien helburua da, batetik, elkarrizketa espezializatu bat bideratzea zibersegurtasunak sektore kritikoetan dituen erronka espezifikoak identifikatu ahal izateko, eta, bestetik, lankidetza eraginkorra sustatzea erronka horiei aurre egin behar dietenen eta teknologia aurreratuekin soluzioak eman ditzaketenen artean.

Kongresuan, TECNALIAko eta Industria, Trantsizio Energetiko eta Jasangarritasun Saileko hizlariak ez ezik, Espainiako eta nazioarteko erreferentziako eragileak izango dira (adibidez, Zibersegurtasunaren Euskal Agentzia – Cyberzaintza, INCIBE, RENIC, CCI, Women4Cyber eta ECSO), baita ekosistemako funtsezko erakundeak ere (BAIC, Ziur, BRTA eta GAIA-Cybasque, besteak beste).

Kongresuak arlo hauek izango ditu ardatz:

Hornikuntza-katearen babesa. Kudeatzaileek hornikuntza-kate estrategikoen segurtasuna, jarraitutasuna eta sendotasuna bermatzeko dituzten erronkak landuko dira biltzarrean, arreta berezia jarrita euskal enpresa-sarearen babes- eta erresilientzia-beharrei.

Erantzun sektorial espezializatua. Elkarrizketa piztea 4.0 Industriaren, smart grid edo energia-sare adimendunen, osasun-arloaren eta industria espazialaren benetako beharrei buruz, eta haien berezitasunetara egokitutako soluzio teknologikoak eskaintzea.

Berrikuntza teknologikoa eta euskal ekosistema bultzatzea. Zibersegurtasunaren arloan Euskadin garatu diren azken joerak erakustea eta tokiko industrian ezar daitezen bultzatzea, era horretan haren lehiakortasun globalari laguntzeko.

Ikusgarritasun estrategikoa eta oihartzun mediatikoa. Euskadi zibersegurtasunaren nazioarteko erakusleiho bihurtzeko aukera da, eta, hala, arlo horretan egindako apustu estrategikoari balioa ematea eta euskal sektorea Europako erreferentzia teknologiko gisa proiektatzea.

CyberIndustry Congress erakusleiho ezin hobea izango da heldutasun teknologiko desberdinetan dauden soluzioak eta berrikuntzak erakusteko, industrian teknologia horiek bizkorrago ezartzen laguntzeko, eta zibersegurtasuna Euskadiren etorkizunerako funtsezko faktore bereizgarri bihurtzeko.