Zárate-Mateok finantza-merkaturako robot inbertsiogileak sortu ditu

Arabako startup honek adimen artifizialean oinarritutako softwarea garatu du

“Aukera eman nahi diegu burtsa-merkatuari buruzko ezaguerarik ez duten pertsonei, beraien finantzen protagonistak izan daitezen”, ziurtatu du Alain Mateok, Eriz Záraterekin batera Zárate-Mateo Algorithmic Systems enpresa sortu zuen ekintzaileak. Startup teknologikoak finantza-merkatuei aplikatutako adimen artifizialean espezializatu eta inbertsioak modu automatizatuan egiten dituen software-soluzioa garatu du. Enpresa hau izango da, Eusko Jaurlaritzako Ekonomiaren Garapen eta Azpiegitura Sailak eta Spri Taldeak babesten duten ekintzailetzari buruzko B-Venture ekitaldian parte hartuko duten 24 startupetako bat.

Zárate-Mateok garatutako sistemak hodeiko konputazioaren teknologiak, adimen artifiziala eta deep learning deritzona erabili ditu robot inbertsiogilea sortzeko. Softwareak finantza-merkatuko datuak denbora errealean aztertu eta patroiak detektatzeko gaitasuna du, eta bere kasa ikasi ahal du, salerosteko erabakiak modu guztiz automatizatuan hartzeko. Hortaz, soluzioa inbertitzeko kapitala izan baina burtsa-merkatuari buruzko ezaguerarik ez duten pertsonei eta erakundeei zuzenduta dago.

Broker eta bankuen finantza-aholkularitza bezalako ohiko soluzioen aldean, startup honen softwareak datuen analitikaren eta robotizazioaren abantailak eskaintzen ditu. “Gizakiaren esku-hartzea bazterturik, emozionaltasuna ere kendu dugu erabakiak hartzeko unean, eta hori oso garrantzitsua da burtsan inbertitzerakoan”, adierazi du Alain Mateo enpresako finantza-zuzendariak; “berealdiko kontzentrazioa eskatzen duen lana da, izan ere, datu pilo bat aztertu behar dira denbora errealean”. Gainera, sistemak bitartekariak murrizten ditu, mozkinen portzentajea handituz bezeroarentzat.

Startup arabarrak bi negozio-eredu ditu. Alde batetik, inbertsio-sistema automatizatua alokatzen du, transakzioetan lortutako etekinen % 30en truk. Bestetik, software arloko kontsultoretza zerbitzuak eskaintzen ditu soluzio pertsonalizatuak garatzeko eta kapital-funtsak bezeroaren beharren arabera kudeatzeko. “Ez dugu finantza-aholkularitza eskaintzen; burtsa-merkatuari aplikatutako adimen artifizialean trebatuta gaude eta soluzio teknologikoak garatzen ditugu”, argitu du Zárate-Mateoko CFOak.

Enpresa 2018an sortu zen eta 2019an partikularrei eta enpresei zuzendutako soluzioak eskaintzen hasi da. Startupa BIC-Araban kokatuta dago eta Spri Taldeak emandako laguntzari esker eratu zen Ekintzaile programaren bitartez, baita SECOTi esker ere, Banco Santanderren Explorer ekimenaren barruan.

UpEuskadi Spri Taldeak bultzatutako Euskal Ekintzailetza Ekosistemaren plataforma da, euskal startupei sustepenerako aukerak eta laguntzarako tresnak eskaintzea xede duena.

Lotutako albisteak

18 apirila, 2024 Ekintzailetza

Wake Up! Albiste ekintzaile batzuk sarean 240415

Irakurri gehiago

18 apirila, 2024 Ekintzailetza

Abian da ekintzailetza berritzailea sustatzeko Toribio Echevarria sarien 34. edizioa

Irakurri gehiago

17 apirila, 2024 Ekintzailetza

Grabitek bat egin du NVIDIA Metropolisekin ikusmen artifizialeko soluzio aurreratuen bidez saltokietako galera ezezaguna murrizteko

Irakurri gehiago

17 apirila, 2024 Ekintzailetza

Zinemaldia Startup Challenge ekimenaren VI-garren deialdia abian da

Irakurri gehiago

16 apirila, 2024 Ekintzailetza

SPRIk startupekin berritzearen onurak proposatu dizkie ETEei BIND SME Connection programaren bidez

Irakurri gehiago

Joan blog-era