Eusko Jaurlaritzak azarora arte izango ditu zabalik ETEetan AA eta zibersegurtasuna sustatzeko dirulaguntzen programak
- Eusko Jaurlaritzak 28 milioi eurora igo du aurten Euskadiko ETEentzako eraldaketa-programa horien aurrekontua, 14 milioi euro bakoitzarentzat, Ekialde Ertaineko gatazkak eragindako ondorioei aurre egiteko sortutako Euskadiren ezkutu industrialaren neurrien paketearen barruan.
- Mikel Jauregi sailburuak honako hau gogorarazi zuen bere garaian: Davosen aurkeztutako World Economic Forum txostenaren arabera, “datozen 5 urteetan, ELGAko herrialdeetan enpresen % 80 inguruk ezarriko du AA bere prozesuetan, eta horrek eragina izango du enpleguen % 40aren lan egiteko moduan”.
Industria, Trantsizio Energetiko eta Jasangarritasun Sailak azarora izango ditu irekita Euskadiko ETEen eraldaketa digitala sustatzeko dirulaguntzen programak. Adimen Artifizialaren programa azaroaren 2ra arte egongo da irekita, eta Zibersegurtasun Industrialarena hil horretako 23ra arte.
Eusko Jaurlaritzak 28 milioi eurora arte handitu du Euskadiko ETEak digitalizazioaren bitartez eraldatzeko programa horien aurrekontua, eta 14 milioi euro bideratu ditu industriako zerbitzuei eta prozesuei aplikatutako Adimen Artifizialaren proiektuei laguntzeko, eta beste 14 milioi euro Euskadiko industria zibererasoetatik eta informazioa lapurtzetik babesteko, hornitzaile espezializatuen laguntzarekin.
22 milioi eurotik 28rako hazkunde hori Euskadiko industriako ezkutuaren neurrien paketearen barruan sartzen da, Ekialde Ertaineko gatazkak utzi dituen ondorioei aurre egiteko. Zehazki, Eusko jaurlaritzak % 51,4 handitu ditu ETEen eraldaketarako eta dibertsifikaziorako dirulaguntzak, 87 milioi euro gehigarrirekin. Guztira, Eusko Jaurlaritzak 277 milioi euro bideratuko ditu ETEentzako laguntzetara.
Adimen Artifizialaren Programa
Mikel Jauregi sailburuak honako hau gogorarazi zuen bere garaian: Davosen aurkeztutako World Economic Forum txostenaren arabera, “datozen 5 urteetan, ELGAko herrialdeetan enpresen % 80 inguruk ezarriko du AA bere prozesuetan, eta horrek eragina izango du enpleguen % 40aren lan egiteko moduan”.
Horri dagokionez, Adimen Artifiziala 2026 programa Euskadin jarduera-zentroa duten eta adimen artifiziala beren prozesu, produktu edo kudeaketa-ereduetan sartzen aurrera egin nahi duten industria-enpresei eta sektore horri lotutako zerbitzu-enpresei zuzenduta dago. Laguntzak proiektuaren % 60ra arte estali ahal izango du, eta enpresa bakoitzak 100.000 euro jaso ahal izango ditu gehienez. Hori dela eta, aukera bikaina da eraldaketa digitaleko ekimenei anbizio handiagoz ekiteko.
Zibersegurtasun Industrialerako Programa
EAEko industria-sarearen zibersegurtasuna eta lehiakortasuna bermatzeko, programa honek itzuli beharrik gabeko dirulaguntzak eskaintzen ditu, proiektuaren gastu hautagarrien % 60ra arte, eta 100.000 eurora arte urtean enpresa bakoitzeko. Enpresaren barne-zibersegurtasuna hobetzeaz gain, laguntzen bidez produktuaren zibersegurtasun-proiektuei ekin dakieke bere bizi ziklo osoan zehar: diseinu segurutik eta kodearen berrikuspenetik, zifratzeraino, ahultasunen kudeaketaraino eta produktuaren ebaluazio edo ziurtapeneraino.
Bi programa horiek Euskadi 2030 Industria Planaren Industria Onenaren Ardatzaren lehentasunetako bat dira, zehazki, adimen artifiziala eta zibersegurtasuna sustatzeko beharra adierazten duena. Programaren helburua IRABAZI, HAZI eta JAUZI sektore estrategikoak indartzea eta garatzea da, zibersegurtasunaren eta enpresa-erresilientziaren hobekuntza sustatuz.
