TRIVIMA, eraikitzen hasi aurretik zure etxebizitza bisitatu eta pertsonalizatzeko aukera ematen duen arkitektura birtualeko enpresa
TRIVIMA Donostiako enpresa bat da, arkitektura birtualeko zerbitzuak eskaintzen dituena. Horri esker, bezeroek etorkizuneko etxebizitzak bisitatu eta pertsonalizatu ditzakete, eraiki aurretik. Zortzi langile dituen ETEa izan arren, fakturazioaren % 15 I+Gra bideratzen du. Eusko Jaurlaritzaren Zibersegurtasun Industriala programaren laguntza jaso du; programa horrek zibersegurtasuna sustatzen du euskal enpresetan, arlo horren inguruko egitura ekonomikoa sortuz eta SPRIren bidez egituratuz.
2020an sortu zen, arkitektoek, programatzaileek eta diseinatzaileek bat egiten duten diziplina anitzeko taldearen kezkak bultzatutako kooperatiba gisa. “Lehen egunetik, arkitekturaren zorroztasun teknikoa errealitate birtualaren eta beste teknologia batzuen ahalmen izugarriarekin uztartzea izan da gure ikuspegia, esperientzia murgiltzaileak eta interaktiboak sortuz, render tradizionala atzean uzten dutenak”, dio kooperatibako bazkide eta sortzaileetako batek, Joseba Salbidek.
Zerbitzuak eskaintzetik inpaktu handiko produktu teknologiko propioak sortzera egin du jauzi estrategikoa, eta horrek markatu du enpresaren bilakaera. “Gure ibilbidean funtsezko mugarria izan da gure Morroi Birtual Interaktiboa (AVVI) sendotzea. Tresna honek sektoreko azoka handietan egoteko aukera eman digu, SIMAn kasu, AEDAS Homes bezalako erreferentziazko sustatzaileen eskutik”.
Enpresak Real Estateko ekosistemarako, arkitekturarako, altzarigintzarako eta interiorismorako egiten du lan batez ere, “baina kultura, gizarte eta osasun sektorerako eta industriarako neurrira egindako aplikazioak ere garatzen ditugu. Gure produktu izarra AVVI da, tresna interaktibo bat, eraiki aurretik, erabiltzaileei etorkizuneko beren etxebizitzak bisitatu eta pertsonalizatzeko aukera ematen diena. Gainera, ingurune birtual konplexuak eta kalitate bisual handikoak diseinatzen ditugu Unreal Engine motor grafikoa erabiliz”.
Gaur egun, TRIVIMAk 8 pertsonako taldea du, eta talde horrek arkitektura, ingeniaritza, 3D diseinua, programazioa eta marketina integratzen ditu. Ekitaldi honetarako 390.000 euroko fakturazioa aurrez ikusten du. “Espezializazio-maila handiko egiturari horri esker, erronka teknologiko oso konplexuei egin diezaiekegu aurre korporazio handientzat, betiere tratu zuzena, malgua eta bezero bakoitzari egokitua bermatuz”.
Berrikuntza
Berrikuntza funtsezkoa da kooperatibentzat, eta fakturazioaren % 15 I+Gra bideratzen du. “Sail isolatua izan beharrean, gure egitura osoak teknologia aplikatuaren laborategi konstante baten moduan funtzionatzen du. Adimen Artifiziala gure salmenta-ekosistemetan txertatzeko eta gero eta murgiltzaileagoak eta naturalagoak diren erabiltzaile anitzeko VR sistemak garatzeko ikertzen dugu”.
Euskadi barruan elkarlanak duen balio handia azpimarratu dute. “TRIVIMAn uste osoa dugu Habic bezalako klusterrekin edo Deustu bezalako unibertsitateekin aliantza estrategikoak egituratu behar direla. Sinergia horiek, talentu berria elikatzeaz gain, euskal industria sortzailea eta teknologikoa Europa mailako abangoardiako erreferente ukaezin gisa kokatzen duten baterako proiektuak bultzatzen dituzte”.
SPRI Taldearen laguntzak jaso ditu zibersegurtasun industriala programaren bidez. “Zibersegurtasunaren laguntza funtsezkoa izan da gure azpiegitura eta sareak blindatzeko. Aurrerapauso kritikoa izan da, gure bezeroen datuak, CRMak eta 3D ereduak kudeatzen baititugu”.
Epe laburrera begira, erronka nagusiak “Adimen Artifiziala bere tresnetan modu masiboan integratzea dira, espazio birtualak adimendunak, erreaktiboak eta prediktiboak izatea lortuz. Gure soluzioak nazioartera zabaldu nahi ditugu, eta Euskadiko erreferentziazko bazkide teknologiko gisa finkatu, bezero-esperientzia erabat irauli nahi duen edozein enpresarentzat (habitataren sektorekoa edo industria arlokoa)”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
