Cyber Surgeryk robotika kirurgikoaren belaunaldi berria bultzatu du Euskaditik
Berrikuntza teknologikoa praktika klinikoa hobetzeko gai diren soluzio bihurtzea da osasun-industriaren erronka nagusietako bat. Cyber Surgery Euskadiko teknologia-enpresak, hain zuzen ere, horren inguruan egiten du lan, eta ALAYA garatu du. ALAYA zehaztasun handiko prozeduretan zirujauari laguntzeko diseinatutako robot-laguntzailea, eta orain, hazkundea, ospitaleetako ezarpena eta nazioartekotzea ezaugarri dituen etapa berriari ekin dio. Haren garapenaren eta merkatuan ezartzearen testuinguruaz hitz egin zuen Jorge Presa CEOak Made in Basque Country programan.
Nola definituko zenuke ALAYA eta zer ekarpen egiten dio ebakuntza-gelari?
ALAYA ebakuntza gelan modu naturalean integratzeko eta zehaztasun handiko ebakuntzetan zirujauari laguntzeko diseinatutako laguntzaile robotiko kirurgikoa da. Sistema trinkoa, mugikorra eta ergonomikoa da, eta mediku-taldeen ohiko dinamikara egokitzen da, haien lan egiteko modua aldatu gabe. Diseinuak doitasun robotikoa, erabilerraztasuna eta interfaze intuitiboa uztartzen ditu, espezialistak sistema modu erraz eta eraginkorrean kontrolatu ahal izan dezan. Haren helburua ez da zirujauaren esperientzia ordezkatzea, baizik eta esperientzia hori indartzea, ebakuntzan zehaztasun, egonkortasun eta kontrol handiagoa eskainiz.
Nola sortu zen proiektua eta zer beharri erantzun nahi zion?
Cyber Surgery behar kliniko oso zehatzari erantzuteko sortu zen: zirujauari prozedura kirurgiko konplexuen berezko muga batzuk gainditzen laguntzea. Ekimenaren oinarrian CEITen, Nafarroako Unibertsitate Klinikaren eta Egile Taldearen arteko lankidetza dago. Aliantza horren ondorioz sortu zen gero Cyber Surgery, robotika kirurgikoan espezializatutako enpresa gisa. Ebakuntza gelako esperientziari esker, hainbat faktore identifikatu ahal izan ziren, hala nola nekea, eskuzko doitasunaren mugak edo denbora tarte luzez jarrera jakin batzuk mantentzeko zailtasuna. Errealitate horretatik abiatuta, osasun arloko profesionalen aliatu gisa jardungo zuen teknologia bat garatzea izan zen helburua, haren irizpide klinikoa eta erabakiak hartzeko gaitasuna ordezkatu gabe.
Teknologia medikoaren garapenak prozesu konplexuak izan ohi ditu. Nolakoa izan da bilakaera hori?
Konpainiak aitortzen du teknologia mediko aurreratua garatzeak erronka teknologiko, arautzaile eta kliniko handiei aurre egitea eskatzen duela. Prozesua aurrera eraman ahal izateko, iraunkortasuna, egokitzeko gaitasuna eta osasun arloko profesionalekiko lankidetza estua behar izan dira, soluzioak segurtasun- eta eraginkortasun-estandar gorenei erantzuten diela bermatzeko. Horren emaitza da etorkizuneko ikuspegia izatetik ospitaleetan jada presente dagoen eta benetako ingurune klinikoetan erabiltzen den soluzio bihurtu den teknologia hau.
Zer unetan dago orain Cyber Surgery?
Hazkunde handiko garaia bizi du enpresak, garapen teknologikotik merkataritza eta ospitaleen ezarpenerako trantsizioa burutu ondoren. Gaur egun, ALAYA bost ospitaletan dago instalatuta: lau Espainian eta bat Belgikan. Azken hori konpainiaren lehen nazioarteko erreferentzia da, eta atzerrian hedatzeko estrategiaren hasiera zehaztu duen mugarria da. Guretzat, aurrerapen horrek erakusten du haren balio-proposamenak garapen-fasea gainditu duela eta dagoeneko praktika klinikoan integratzeko eta ospitale, profesional eta pazienteentzat balioa sortzeko prest dagoen soluzio bihurtu dela.
Konpainiak hainbat aintzatespen jaso ditu oso denbora laburrean. Zer i esker lortu du bilakaera hori?
Gure ustez, gakoa hasiera-hasieratik oso helburu argiari eustea izan da: benetako behar klinikoari erantzutea. Planteamendu hori zirujauekin eta osasun arloko espezialistekin izandako lankidetza estuan oinarritu da, baita ingeniaritza, ezagutza klinikoa, erregulazioa, fabrikazioa eta negozio garapena integratzeko gai den diziplina anitzeko taldean ere. Jasotako aintzatespenak, haien ustez, teknologia bereizgarriaren, helburuaren eta gauzatzeko gaitasunaren arteko konbinazioaren ondorio dira.
Badirudi talentuak funtsezko zeregina duela horrelako proiektu batean…
Cyber Surgeryk pertsonak jartzen ditu bere aktibo nagusien artean. Robot kirurgiko bat garatzeko, ingeniaritza aurreratuan, softwarean, fabrikazioan, osasun erregulazioan edo ezagutza klinikoan espezializazio maila altua duten profilak konbinatu behar dira. Baina, osagai teknikoaz harago, konpainiak konpromisoaren, lankidetzaren eta ikuspegi partekatuaren garrantzia nabarmentzen du, sektore oso zorrotzean nazioartean lehiatzeko gai den erakundea eraikitzeko.
Zein izan da osasunaren arloan ekitearen erronka nagusia?
Konpainiak adierazi duenez, erronkarik handiena berrikuntza teknologikoa ebakuntza gela barruan modu seguruan eta ohikoan erabiltzeko soluzio bihurtzea izan da. Osasun arloan ez da nahikoa teknologia aurreratua garatzea; ezinbestekoa da haren erabilgarritasun klinikoa baliozkotzea, segurtasuna frogatzea eta ingurune zorrotzenetako batean lan egiten duten profesionalen konfiantza sortzea. Cyber Surgeryren ustez, berrikuntzak benetako balioa lortzen du praktika klinikoan modu naturalean integratzea eta emaitzak hobetzen laguntzea lortzen duenean.
Zer dakar berekin pazienteengan eta profesionalengan eragin zuzena duen teknologia garatzeak?
Enpresarentzat, aldi berean, erantzukizun handia eta proiektuaren motibazio nagusia da. Aurrerapen bakoitzak oso helburu zehatza du: zirujauei lana erraztea, prozeduren zehaztasuna, segurtasuna eta eraginkortasuna areagotzen duten tresnen bidez, aurrerapen horren bidez, pazienteek arreta hobea jaso dezaten.
Zer helburu ditu Cyber Surgeryk?
Konpainiak robotika kirurgikoaren arloan nazioarteko erreferenteetako bat izatea du helburu. Gure helburua ALAYA mundu osoko ospitaleetan gehiago zabaltzea da, eta zenbait prozedura kirurgiko eraldatzeko gai diren soluzioak garatzen jarraitzea, gero eta kirurgia zehatzagoa, seguruagoa eta eskuragarriagoa lortzeko. Nazioarteko hedapenari ekin ondoren, etapa berria dugu aurrean. Etapa horretan, berrikuntzak, hazkunde teknologikoak eta profesional sanitarioekiko lankidetzak gure enpresaren ibilbide-orria zehazten jarraituko dute. Enpresak Euskadin garatutako teknologia robotika medikoaren sektoreko erreferenteen artean kokatu nahi du.
