TM Telleria, Europako erreferentea zentral hidroelektrikoetarako osagaien mekanizazioan

TM Telleria Urretxun (Gipuzkoa) kokatutako enpresa da eta zentral hidroelektrikoetarako osagai mekanikoen mekanizazioan Europako erreferenteetako bat da. Konpainiak produkzioaren % 80 esportatzen du eta adimen artifiziala era kontrolatuan aplikatzea defendatzen du. Enpresak Eusko Jaurlaritzaren zibersegurtasun industrialaren programaren laguntza jaso du. Programa horrek zibersegurtasuna sustatzen du Euskadiko enpresetan, gai horri buruzko egitura ekonomikoa sortuz, SPRIk antolatuta.

Enpresa 1976an sortu zen Legazpiko Brinkola auzoan, tokiko merkatura zuzendutako mekanizazio-lanetarako. Pixkanaka, jarduera zabaltzen joan zen, eta 1986an Zumarragara eraman zuten, gaur egun duen izenarekin: TM Telleria. Orduan, GSB Forja enpresarentzat hasi zen lanean, palierrak mekanizatzen, eta, produkzio-jarduera handitu ahala, pabiloi gehiago erosi zituen lanak garatu ahal izateko.

Baina 2005etik aurrera, jarduera nabarmen aldatu zen eta merkatuak Espainiara mugatuta egoteari utzi zion. “Arazo bat izan genuen zentral hidroelektrikoetarako osagaiak urtzen zituen bezero batekin. Bere bezeroei gure lana eskaini genien, eta merkatu horretan sartu ginen. Hain zuzen ere, gaur egun, gure jardueraren % 90 biltzen du horrek”, esan dute Jose Luis Romero gerenteak eta Amaia Telleria administrazio-arduradunak. Izan ere, TM Telleria zentral hidroelektrikoen munduko hiru ingeniaritza-enpresa nagusien hornitzaile globala da. “Beste nolabait esanda, “Europako top 10ean gaude”.

Aurreko hamarkadan, aldaketa handia iritsi zen. Enpresak Zumarragan bereizita zeuden nabeak zituen eta, ondoko udalerrian, Urretxun, kilometro eskasera, lurzoru industriala erosteko aukera izan zuen, instalazioak bateratu ahal izateko.

“2018an, Udalarekin hitzarmena sinatu eta erosi egin genituen. Deskontaminazio eta eraispen-lanak egin behar izan ziren, eta horiek guztiak pandemiarekin eta Ukrainako gerraren osteko lehengaien krisiarekin batera gertatu ziren”. Iazko udatik, enpresak Urretxuko egoitza berrian du jardueraren zati handi bat. “2027ko martxorako, jarduera eta pertsona guztiak hemen egotea aurrez ikusten dugu. 3.600 metro koadroko azalera izatetik 6.900 izatera igaro gara, layout hobearekin eta hazteko aukera gehiagorekin”.

Zentral hidroelektrikoak

TM Telleriaren jarduera nagusia mekanizazioa da, “baina bezeroari behar duenaren araberako soluzio egokiak eskaintzen dizkiogu: lehengaitik eta horrekin lotutako saiakuntzetatik hasi, eta mekanizazioraino. Baina, horrez gain, beste zerbitzu batzuk ere eskaintzen ditugu, hala nola tratamendu termikoa edo pintura, azpikontratazioen bidez. Mekanizazio-lana guk egiten dugu”. Bere bezeroak sektore hauetakoak dira: zentral hidroelektrikoak (% 90), ontzigintza (% 6) eta automobilgintza (% 4).

50 langile inguru ditu, eta urtean 10 milioi euro fakturatzen ditu. “Helburua da datozen urteetan 15 milioira iristea”. Esportazioek negozioaren % 80 hartzen dute eta Frantzian, Alemanian, Finlandian, AEBetan eta Kanadan kontzentratzen dira.

Zibersegurtasun industrialeko programaren baitan SPRI Taldetik jasotako laguntza datuen eta prozesuen segurtasuna hobetzera bideratu da.

Etorkizuneko erronken artean daude “lekualdaketa amaitzea, erabakiak hartzeko datuen analisi handiagoa egitea, adimen artifiziala modu kontrolatuan aplikatzea eta hidroelektrikoen, ontzigintzaren eta aeronautikaren merkatuak indartzen jarraitzea”. Halaber, nazioarteko presentziari eustearen alde egiten du, “eta proiektuaren iraunkortasunean aurrera egitearen alde, maila ekonomikoan, sozialean eta ingurumenekoan”.

SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.