Eusko Jaurlaritzak nazioarteko lankidetzarako bide berriak sustatu ditu Austria, Polonia eta Hego Koreako ordezkaritzen bisitarekin
Basque Trade & Investment-ek nazioarteko hiru ordezkaritza hartzen ditu egunotan Euskadin, Austria, Polonia eta Hego Koreatik etorriak, ezagutza-trukea sustatzeko, lankidetza-harremanak sendotzeko eta lankidetzarako aukera berriak sortzeko hainbat ekimenen esparruan.
Karintiako Ekonomia Ganberak, Łukasiewicz – ITECH Institute of Innovation and Technology institutuko eta Silesia Behereko eskualdeko Gobernuko ordezkariek eta Korea Wind Energy Industry Association-ek (KWEIA) hainbat lan-programa garatzen dituzte egunotan Euskadin. Agendei esker, ordezkaritzek Euskadiko gaitasunak, politikak, proiektuak eta eragileak bertatik bertara ezagutzen dituzte, eta erakundeetako ordezkariekin, enpresekin eta erakunde espezializatuekin bilerak egiten dituzte.
Karintiako ordezkaritzak, Jürgen Mandl Karintiako Ekonomia Ganberako presidentea buru duela, Euskadiren gaitasunak ezagutzea eta lankidetza- eta inbertsio-aukerak identifikatzea du helburu, arreta berezia jarrita digitalizazioan, 4.0 industrian, adimen artifizialean, mugikortasun jasangarrian eta sektore aeroespazialean.
Programaren barruan, ordezkaritzak Basque Trade & Investment eta SPRIrekin bilerak egiten ditu, eta GAIAren eta CYBASQUEren ekimenak ezagutzen ditu. Agendak TECNALIAra, Aeronautikako Fabrikazio Aurreratuko Zentrora (CFAA) eta MUBILera egindako bisitak ere jasotzen ditu; bertan, Euskadin garatutako hainbat esperientzia eta gaitasun ezagutzeko aukera du.
Bestalde, Łukasiewicz – ITECH Institute of Innovation and Technology institutuko eta Silesia Behereko eskualdeko Gobernuko ordezkariek Euskadi bisitatzen dute Innovative Lower Silesia proiektuaren esparruan. Bisitaren helburua da Euskadiko berrikuntza-eredua bertatik bertara ezagutzea, eta, horrez gain, ikerketaren, garapen teknologikoaren eta ezagutzaren transferentziaren ekosistema osatzen duten politikak, tresnak eta eragileak ezagutzea.
Programak Basque Trade & Investment eta SPRIrekin bilerak egitea aurreikusten du, bai eta GAIA, Euskadiko Parke Teknologikoa, Innobasque, BIC Bizkaia eta Tecnaliarekin topaketak egitea ere. Saio horietan, besteak beste, ekintzailetza, ikerketa aplikatua, transferentzia teknologikoa, digitalizazioa eta ezagutzaren eta enpresa-sarearen arteko lotura jorratzen dira.
Silesia Behereko bisita Euskadiren eta Poloniaren arteko harreman ekonomikoen testuinguruan garatzen da. Euskadik Poloniara egindako esportazioek 573 milioi euroko balioa izan zuten 2026ko lehen zazpi hilabeteetan, 2025eko aldi berean baino %14 gehiago. Halaber, gaur egun, 40 euskal enpresak 52 establezimendu dituzte Polonian.
Bi misio horiei Korea Wind Energy Industry Association-en (KWEIA) bisita gehitzen zaie, Hego Koreako ekonomia-hedabide nagusietako sei kazetarirekin batera. Ordezkaritzak Euskadiko energia eolikoari lotutako enpresa- eta teknologia-ekosistema eta trantsizio energetikoaren eta itsasoko energia eolikoaren inguruan garatutako gaitasunak ezagutzeko aukera du.
Bisita horren barruan, KWEIAren eta Basque Trade & Investment-en arteko Akordio Memorandum (MoU) bat sinatuko da. Horren bidez, bi ekosistemen arteko harremana estutuko da, ezagutza partekatuko da eta lankidetzarako aukera berriak aztertuko dira. Programak euskal enpresetara bisitak ere jasotzen ditu, energia eolikoaren balio-kate oso eta lehiakorra nola garatu den ezagutzeko, bai eta horri lotutako industria- eta teknologia-gaitasunak ere.
Hiru ekimen horiekin, Basque Trade & Investment-ek nazioarteko lotura-lana eta euskal ekosistema interes estrategikoko merkatu eta eskualdeetara hurbiltzeko lana indartzen ditu. Enpresa- eta erakunde-ordezkaritzekin harreman zuzena izateak ezagutza partekatzea, harreman berriak sortzea eta Euskadiren nazioarteko proiekzioan lagunduko duten lankidetza-aukerak sustatzea ahalbidetzen du.
