D&A Innovative Systems enpresak soluzio adimendunak garatzen ditu digitalizazio industriala bizkortzeko
D&A Innovative Systems enpresak IoT, adimen artifiziala, elektronika, datu-analitika eta cloud plataformak konbinatzen dituzten soluzio teknologikoak garatzen ditu, industriaren digitalizazioa bultzatzeko. Gipuzkoako enpresak hainbat proiektu diseinatzen ditu, datuak atzitzea eta informazio erabilgarri bihurtzea prozesuak optimizatzeko eta erabakiak hobeto hartzeko.
Konpainia 2015ean sortu zen, Bizkaian, industriari lantokian aplika daitezkeen eta benetako arazoak konpontzeko gai diren digitalizazio-irtenbideak gerturatzeko helburuarekin. “Hasieratik ulertu genuen digitalizazio industriala ezin zela soilik softwarearen bidez egin. Informazio erabilgarria lortzeko gai izan behar da aktiboraino iristeko, datua behar bezala atzemateko eta erabakiak hartzea ahalbidetzen duen informazio bihurtzeko“, azaldu du Alberto Blázquez D&A Innovative Systemseko CEOak.
Industria eraldatzeko teknologia
Enpresak sentsorika, IoT gailuak, elektronika, firmwarea, komunikazioak, cloud plataformak eta adimen artifiziala integratzen dituzten proiektu osoak garatzen ditu. Aktiboak monitorizatzetik mantentze-lan prediktiboko soluzioetara, automatizaziora, prozesuen optimizaziora eta biki digitaletara eboluzionatu du.
Gaur egun, enpresa industrialen helburua geldialdiak murriztea da, hutsegiteei aurrea hartzea, kalitatea hobetzea, baliabideak optimizatzea eta trazabilitate handiagoa izatea. Premia horiei erantzuteko, D&A bazkide teknologiko gisa aritzen da elkarlanean makina-fabrikatzaileekin, beren ekipoetan zuzenean konektagarritasuna, urruneko monitorizazioa, mantentze-lan prediktiboa eta zerbitzu digital berriak txertatzeko. “Gure helburua ez da teknologia berez sartzea, baizik eta balioa ematen duen informazioa identifikatzea eta hori lortzeko behar den arkitektura diseinatzea“, adierazi du Blazquezek.
Konpainiak hainbat sektoretan egiten du lan, hala nola manufaktura-industrian, galdategian, trenbideko garraioan, uraren kudeaketan, energian eta logistikan. Esparru bakoitzak behar desberdinak dituen arren, guztiek partekatzen dute banatutako aktiboak kudeatzeko, gorabeherei aurrea hartzeko eta dagoen informazioa hobeto aprobetxatzeko erronka.
Adimen artifiziala eta biki digitalak soluzio horien bilakaeraren parte dira, betiere datu fidagarrietan eta prozesu industrialaren ezagutzan oinarrituta. “Adimen artifizialak balioa ematen du soilik kalitatezko eta testuinguru industrialeko informazioa duenean. Konbinazio horrek arazoak aurreratzea eta operazioa optimizatzea ahalbidetzen du”, adierazi du CEOak.
Berrikuntza Euskaditik
D&Aren ustez, berrikuntzaren euskal ekosistema funtsezkoa izan da bere hazkundean. Enpresa elkarlanean aritzen da konpainia industrialekin, zentro teknologikoekin, unibertsitateekin eta beste eragile batzuekin, proiektu konplexuak garatzeko eta ezagutza hori nazioko eta nazioarteko aplikazioko soluzioetara helarazteko.
SPRIk eta Eusko Jaurlaritzak, Hazitek, besteak beste sustatutako zenbait programatan ere parte hartu du konpainiak. Programa horiei esker, industria-prozesuei aplikatutako ikerketa eta adimen artifizialeko osagai garrantzitsua duten I+Gko proiektuak garatu ahal izan ditu. “Programa hauek elkarlana bultzatzen dute eta ezagutza enpresa produktu eta gaitasun berri bihurtzeko aukera ematen dute”, nabarmendu du Blazquezek.
Haren jarduera nagusien artean, nabarmentzekoak dira CLOMOS plataforma teknologikoaren garapena, IoT hainbat familia-gailu eta trenbide-sektoreko, galdaketako, fabrikazio aeronautikoko, uraren kudeaketako eta logistikako proiektuak. Gainera, enpresak fabrikazio eta muntaketa elektronikorako gaitasuna indartu du, bere soluzioen garapen ziklo osoa kontrolatzeko.
Etorkizunera begira, D&Ak makineria fabrikatzaileen bazkide teknologiko gisa duen zeregina indartzen jarraituko du, adimen artifiziala, IoT gailu autonomoagoak eta digitalizazio industriala bizkortzea ahalbidetzen duten soluzio eskalagarriak txertatuz. “Industriatik gertu dagoen enpresa izaten jarraitu nahi dugu, prozesu bakoitza ulertzeko eta erronkak konpontzeko beharrezko teknologia garatzeko gai dena”, ondorioztatu du Alberto Blazquezek.
Digitalizazio industriala funtsezko faktore bihurtu da enpresen lehiakortasuna, eraginkortasuna eta egokitzeko gaitasuna hobetzeko. Zure erakundeak IoT, adimen artifiziala, biki digitalak edo 4.0 Industriari lotutako soluzioak garatzen baditu, kontsultatu SPRIren programak eta zerbitzuak proiektu berriak bultzatzeko.