Edi Elevator enpresak plataforma jasotzaile bat garatu du mugikortasun urriko pertsonen autonomia hobetzeko
Gurpil-aulki elektrikoa edo mugikortasunerako scooterra garraiatzeko zailtasuna Edi Elevator enpresaren sorreraren arrazoi nagusia izan zen, 2024aren amaieran Gasteizen sortutako konpainia. Mugikortasun gailu horien erabilera areagotzeak agerian ez dagoen arazo bat eragiten du: horietako askok 40 eta 100 kilo arteko pisua izan dezakete, eta horrek zaildu egiten du ibilgailuan kargatzea, batez ere erabiltzaileentzat eta haien laguntzaileentzat. Behar horretatik abiatuta, bizikletak eramateko gailu baten antzeko plataforma bat garatzeko ideia sortu zen, baina askoz karga handiagoak jasateko prestatua.
Grapen horren emaitza Easytrans da, plataforma jasotzaile bat, ibilgailuaren atoi-bolaren gainean instalatzen dena eta gurpil-aulki elektrikoa edo scooter-a kanpoan garraiatzeko aukera ematen duena, maletategian lekurik okupatu gabe. Sistema beherantz doa, lurraren arrasean geratu arte, karga errazago jartzeko, eta, ondoren, garraiatzeko posizioraino igotzen du. Plataformak, gainera, blokeo eta segurtasun sistemak ditu, eta 120 kilora arteko kargekin probatu dute.
Garapen-prozesuan, Edi Elevator-ek soluzioak probatu zituen mugikortasunari eta bizkarrezur-muineko lesioei lotutako erakunde eta entitateekin, besteak beste, Toledoko Paraplegikoen Ospitale Nazionalarekin, Madrilgo Muineko Lesionatuen Fundazioarekin eta Arabako ELAko pazienteen elkartearekin. Esperientzia horiek hobekuntzak egiteko balio izan zuten, gailua irisgarriagoa eta erabilera sinpleagoa izan zedin.
Garatutako produktuarekin, Arabako konpainiak etapa berri bat hasi du, produktu hori zabaltzeko eta merkaturatzean aurrera egiteko. Horren harira, azaroan Orto Medical Care azokan parte hartuko du enpresak Madrilen, sektoreko azokarik garrantzitsuenean. Prestatzen dituen hobekuntzen artean, urrutiko aginte bidez eragindako eta ibilgailuaren bateriak zuzenean eragindako moldaketa bat dago.
Edi Elevator-en epe ertaineko helburua bere teknologiaren aplikazioa zabaltzea eta Europako merkatuan murgiltzea da. Mekanikaren, elektrizitatearen eta elektronikaren arloetako profesionalek osatzen dute enpresa, eta behar espezifikoak dituzten pertsonen mugikortasuna eta karga astunen garraioa errazteko irtenbideak garatzen jarraitzea aurreikusten du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
