SAFEMek 60 urte baino gehiagoko esperientzia industriala du hutsaren etorkizunera begira
SAFEM Belauntzan (Gipuzkoa) kokatuta dagoen familia-enpresa da, eta hutseko ponpen fabrikazioan eta konponketan espezializatuta dago, besteak beste, paper-industriaren, meatzaritzaren, elikaduraren, automobilgintzaren, farmaziaren eta petrokimikaren sektoreetarako.
Enpresa Lasarten (Gipuzkoa) sortu zen 1964an, paper-industriari lotutako fabrikazio-lantegi gisa. Gerora, negozioak bilakaera izan zuen, hutseko ponpen arloan zuen ezagutza zabalduz eta, pixkanaka, konponketa-, mantentze- eta ingeniaritza-zerbitzuak txertatuz.
Baina aldaketa esanguratsua orain bost urte gertatu zen, Okobiok, ponpen eta ekipo birakarien konponketan espezializatutako enpresak, erosi zuenean. Eragiketa hari esker, bi enpresen esperientziak uztartu eta SAFEMen industria-proiektua indartu ahal izan zen.
Familiak inbertsio handia egin ondoren, enpresa egungo kokalekura lekualdatu zen, Belauntzara; bertan, espazio handiagoa du eta Okobio enpresatik gertu dago. Horrek taldearen logistika eta gaitasunak integratzea errazten du.
Konpainiak hutseko ponpak fabrikatzen ditu. Ekipo birakariak dira, eta industria-prozesu ugaritan erabiltzen dira, besteak beste, papera eta mineralak lehortzeko prozesuetan, eta elikaduraren, automobilgintzaren eta farmazia-industriaren arloko prozesuetan.
Bere jarduerak ponpen fabrikazioa, ekipoen konponketa eta mantentze-lanak eta ingeniaritza-zerbitzuak hartzen ditu barne, industria-sektore desberdinen beharrei erantzun espezializatua eskainiz.
Funtsean, ore eta paperaren, meatzaritzaren, elikaduraren, automobilgintzaren, farmaziaren eta petrokimikaren sektoreetarako egiten du lan. Bere negozio-ildo nagusiak fabrikazioa, konponketa eta mantentze-lanak eta ingeniaritza dira.
Salmentak
Bere salmenten % 60 atzerrian egiten du, batez ere Latinoamerikan, Estatu Batuetan, Frantzian, Portugalen, Alemanian, Italian, Beneluxen eta Ipar Afrikan. Bordelen merkataritza-bulego bat eta Txilen konponketa-lantegi bat dituzte, eta horrek nazioarteko merkatuetara iristeko gaitasuna indartzen du.
Gaur egun 20 langile ditu, eta fakturazioa 5 milioi euro ingurukoa da. Azken bost urteotan, hazkundea ikusgarria izan da: negozio-bolumena bost aldiz biderkatu da, eta gorakada hori konpainiaren eraldaketa- eta hedapen-prozesuarekin batera gertatu da.
Konpainia soluzio teknologiko berriak garatzen ari da. Proiektu nagusietako bat errodamendu magnetikoak dituen eta zerbitzu-urik behar ez duen hutseko soluzio berria merkaturatzea da. Garapen horrek aurrerapauso handia dakar konpainiaren bilakaera teknologikoaren barruan.
Etorkizunera begira, erronka nagusiak honako hauek dira: modu iraunkorrean hazten jarraitzea, produktuen kalitatea eta estandarrak indartzea eta soluzio berriak merkaturatzen aurrera egitea. Nazioarteko hedapenak ere garrantzi handia izaten jarraituko du, Estatu Batuetan eta Europan hazteko helburuari arreta berezia eskainiz.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
