IDDTEK, industria eta talentua konektatzen dituen ingeniaria
IDDTEK Derioko ingeniaritza-enpresa da eta industria eta talentua lotzen ditu. 22 urtetan, 140 langile izatera iritsi da, eta ingeniaritza-proiektuak garatzen laguntzen die enpresa nagusiei. Enpresak Eusko Jaurlaritzaren zibersegurtasun industrialaren programaren laguntza jaso du. Programa horrek zibersegurtasuna sustatzen du Euskadiko enpresetan, gai horri buruzko egitura ekonomikoa sortuz, SPRIk antolatuta.
2004an sortu zuen Irene Rodriguez bazkide sortzaileak, eta, gaur egun, Komunikazio eta Harreman Instituzionalen zuzendaria da. “Pertsona bakar baten proiektu gisa sortu zena 140 profesionalez osatutako enpresa da gaur egun, eta herrialdeko enpresa industrial nagusietako batzuei laguntzen die beren ingeniaritza-proiektuak garatzen”, adierazi du sortzaileak.
Lehenengo urteetan, negozio-eredua baliozkotu ahal izan zuen; “industriaren beharrak ondo ezagutu eta bezeroen oinarri sendoa sortu”. Hurrengo etapan, etengabeko bilakaera izan zuen, eta sektore berrietara eta ingeniaritzako diziplina berrietara zabaldu zen.
“Hazkunde horren ondorioz, beste urrats bat egin behar izan genuen: kudeaketa profesionalizatu, eta sortzaileetan oinarritutako enpresa batetik erronka berriei aurre egiteko egitura sendoa eta prestatua duen erakunde izatera pasa. Eraldaketa horrekin, gure instalazioak handitu ahal izan genituen, bulego berriak ireki eta modu jasangarrian garatzen jarraitu”.
Gaur egun, Iddteken helburua ez da soilik hazten jarraitzea, “baizik eta geroz eta balio gehiago eskaintzea eta gure ezagutza-arloetan erreferentziazko bazkide gisa finkatzea”.
Enpresa ingeniaritzaren outsourcingean dago espezializatuta, “eta gaitasun tekniko espezializatua integratzen dugu gure bezeroek behar duten lekuan. Lehen mailako enpresa industrialentzat egiten dugu lan, besteak beste, aeronautikaren, automobilgintzaren, ekipo-ondasunen, sare elektrikoen, energiaren, azpiegituren eta industriako instalazioen arloan”.
Lau arlo nagusitan antolatzen dute ezagutza: produktuaren diseinua eta garapena, fabrikazio aurreratua eta 4.0 industria, instalazio industrialak eta azpiegiturak eta kalitatea eta kudeaketa teknikoa.
Egun, 140 pertsonako lantaldea dute eta iaz 6 milioi euroko fakturazioarekin amaitu zuten urtea. Aurreikuspena da aurten zazpi milioi euroak gainditzea.
Berrikuntza
Enpresaren eboluzioa ulertzeko moduaren parte da berrikuntza. “Azken urteetan automatizaziorako ekimenak sustatu ditugu adimen artifizialaren, digitalizazioaren eta barne-prozesuen optimizazioaren bitartez, gure efizientzia hobetzeko eta zerbitzu hobea eskaintzeko”. Lantalde teknikoaren % 50ek bezeroentzako produktu berrien garapenean hartzen du parte, diseinuaren, garapenaren eta industrializazioaren faseetan. “Ingurune oso berritzaileetan lan egiteko eta ezagutza eta esperientzia hori proiektu bakoitzera eramateko aukera ematen digu horrek”.
SPRI Taldeak industria-zibersegurtasuneko programatik jaso duen azken laguntza azpiegitura teknologikoaren segurtasuna indartzera bideratu da. “Hasierako diagnostikoa egin dugu eta babes-neurriak jarri ditugu, bai hardwarearentzat, bai softwarearentzat. Horrez gain, gure domeinu korporatiboaren segurtasuna indartu dugu”
Jarduketa horiei esker, arriskuekiko esposizioa murriztea, informazioa hobeto babestea eta bezeroei ingurune teknologiko seguruagoa eta fidagarriagoa eskaintzen jarraitzea lortu dute. “Ingeniaritzako enpresa batean, lankidetza digitala egunerokoaren parte da, eta, horregatik, zibersegurtasuna ezinbesteko elementua da zerbitzuaren jarraikortasuna eta kalitatea bermatzeko”.
Enpresaren datozen urteetarako erronka nagusia etorkizunerako prest dagoen IDDTEK eraikitzea da. “Bide-orri bat definitu dugu erakunde gisa eboluzionatzeko, eta industriari gero eta balio handiagoa emateko”. Lankidetza geroz eta estrategikoagoa eskaintzeko gai den partner teknologiko gisa finkatzea dute xede, “presentzia geografikoa handituz, ezagutza-arloak indartuz eta erronka berriei aurre egiteko prest egongo den erakundea garatuz”.
“Hogei urte baino gehiagoren ostean, gure helburua dagoeneko ez da besterik gabe haztea. Enpresa sendoagoa, espezializatuagoa eta gaitasun handiagokoa eraiki nahi dugu, industriari etorkizuneko erronkei aurre egiten laguntzeko”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
