ERREKAk industria-dibertsifikazioa indartu du, osasun-sektorearen aldeko apustuarekin
65 urteko ibilbidearekin, ERREKAk dibertsifikazioa bere proiektu kooperatiboari jarraipena emateko bide bihurtu du. Hala, 2026an ERREKA Medical sortzeak osasun-sektorean sartzeko apustua sendotu du, bere industrializazio-gaitasunean oinarrituta. ‘Made in Basque Country’ programan egindako elkarrizketan, Joana Ibarretxe presidenteak bilakaera hori gidatu duten irizpideak eta taldearen etorkizunean eredu kooperatiboak betetzen duen eginkizuna aztertu ditu.
Dibertsifikazioa ERREKAren DNAn dagoela diozu. Zer eginkizun izan du taldearen bilakaeran?
Hasiera-hasieratik kezka bera izan dugu: enplegua sortzea, etorkizuna eraikitzea eta proiektu kooperatiboari jarraitutasuna ematea. Dibertsifikazioak helburu horri erantzuten dio. Ez da aurrez diseinatutako plan handi baten emaitza izan, baina ezta kasualitatearen ondorio ere. Aukeretara irekita mantentzearen ondorioa izan da, unean uneko beharrak ulertu eta proiektu kolektiboa indartu zezaketenean bide berriei ekitera ausartzea.
Dibertsifikatzeak arriskuak onartzea dakar berekin. Zer irizpide erabiltzen dituzue, taldearekin batera, negozio-aukera berri bat baloratzeko?
Bideragarritasun ekonomikoa, merkatua eta teknologia aztertzen ditugu, baita proiektua gure gaitasun teknologiko eta industrialekin bat datorren ere. Epe luzera begira jasangarria eta lehiakorra izan daitekeen ere baloratzen dugu. Baina, kooperatiba gisa, galdera garrantzitsuena da aukera horrek ERREKAren proiektu kolektiboa indartzen lagunduko ote duen.
Torlojuen fabrikaziotik hasi eta osasunaren sektoreraino, ERREKAk oso negozio ezberdinak garatu ditu. Zer irakaspen nabarmenduko zenuke ibilbide horretatik?
Eraldatzen eta aukerak aprobetxatzen ikasi dugu. Gure ibilbidea errepasatuz gero, negozio bakoitza testuinguru desberdinean jaio zela ikusiko dugu: behar jakin bati erantzuten zion edo kooperatiba indartu zezakeen aukera aprobetxatzen zuen. Gaur egun ere irizpide berarekin jokatzen dugu osasun-sektorean, esaterako.
Nola azaltzen duzu ERREKA Medicalek osasunaren sektoreari egin dion ekarpena eta hura sortzeko bideratu duen prozesua?
Gure ekarpena, batez ere, industriala izan da. 2019an Microliquidekin elkarlanean hasi ginen, mikrofluidikan eta diagnostikoan duen ezagutza eta eskalan produktu konplexuak industrializatu eta fabrikatzeko dugun gaitasuna uztartuz. Guretzat bilakaera naturala izan da. ERREKA Medical 2026an sortzea duela urte batzuk hasi genuen apustua sendotzeko azken pausoa da.
65 urte bete dituzue. Zer balantze egiten duzu kooperatibaren egungo egoeraz?
Kooperatiba egoera onean dago, bai emaitza ekonomikoei dagokienez, bai arlo sozialean. Helburu eta eskakizun-maila handiko plan estrategikoa dugu martxan, eta dedikazioz, ahaleginez eta ilusioz ari gara garatzen.
Etorkizunari begira, zer uste duzu zaindu behar duzuela taldeak bilakaera egiten jarraitzen duen heinean?
Zalantzarik gabe, gure espiritu kooperatiboa. Jasotako ondarearen erantzule gara, eta, aldi berean, ERREKA egoera hobean eta sendoagoan uzteko erantzukizuna dugu.