Euskal enpresaren blog-a Zure enpresarentzat garrantzitsua den eguneroko informazioa

4 ekaina, 2016
SegurLeku: “Gustatzen zaigu arima libreak izatea eta errutinazko lanetatik urruntzea!”

Think Big enpresa-ideien lehiaketa bat da, eta bere helburua da espiritu ekintzailea sustatzea Bizkaiko UPV-EHUren campuseko ikasleen artean. Lehiaketa horretan ikasleek beren ezagutzak eta esperientzia profesionalak aplikatzen dituzte, komertzialki bideragarri izango diren zerbitzu eta produktuak garatzeko. 

2016ko edizioan, Asier Jiménez Sánchez, Aitor Bilbao Vélez, Pablo Viana Ruiz de Aguirre, Jaime Arana Antoñanzas eta Iñigo Fernández de Matauco Zornozak osatutako taldeak irabazi du Think Big lehiaketa SegurLeku izeneko proiektuarekin; pasahitz pertsonalizagarri baten bidez irekitzen diren segurtasun armairuen sistema bat da.

 

 

 

Enpresen administrazio eta zuzendaritza ikasten ari zarete, zergatik aukeratu zenuten bide hori zuen prestakuntzan?

Beti gustatu izan zaigu enpresa mundua, eta bostok gaude ekintzailetzaren espezialitatean, oso atsegin dugu eta. Gutako batzuk parte hartu dugu zenbait ekintzailetza proiektutan, esaterako, bada bat padelerako produktuak saltzen dituen Airpadel enpresan aritu zena, beste bat saskibaloi klub bateko presidentea dena eta arropa marka bat sortzen hasi zena… Denok egon gara hainbat proiektutan inplikatuta, eta egunen batean ekintzaile arrakastatsu izan nahi genuke.

 

 

Nolatan animatu zineten zuen proiektuak Think Big lehiaketan aurkeztera? Eta zertan datza proiektua bera? Nondik sortu zen ideia, zein premia ase ditzake?

Duela pare bat hilabete otu zitzaigun ideia, gelan geundela, oinarri teknologikoko enpresa proiektu bat sortzeko “brainstorming” saio baten ondoren. Negozio plana egin genuen ikasgairako, eta María Sáiz irakasleak animatuta erabaki genuen lehiaketan parte hartzea. Bazuen konfiantza gugan, eta ikusarazi zigun posible dela ideia guztiak egia bihurtzea. Bere laguntza funtsezkoa izan da, eta beti izango du gure esker ona.

Ideia aitzindaria da Estatu osoan, ez dago gurea bezalako konponbiderik inongo hondartzatan. Toki batzuetan badaude armairuak, baina gureak kode elektroniko pertsonalizagarri batekin irekitzen dira; beraz, ez da eskumuturrekorik edo giltzarik behar.

 

 

Bitxia da, premia sinplea da, baina oraindik ez du konponbide onik merkatuan.

Hala da, bai. Dena den, SegurLekuk beste balio erantsi batzuk ere identifikatu ditu, erabiltzaileentzat oso interesgarriak izan daitezkeenak, adibidez: WiFi seinalea jasotzeko eta dispositibo mugikorrak kargatzeko aukera, panel informatibo bat informazio eguneratuarekin (olatuak, bandera)…

Argi dago hondartzara maiz joaten den jendearen premia batzuk konpondu ditugula, baina badaude beste onuradun batzuk ere, esaterako, ur kirolak egiten dituztenak, ez baitute izaten beren gauzak gordetzeko tokirik.

Era berean, asmoa dugu app bat eta estetika paregabe bat sortzeko; horregatik guztiagatik, SegurLeku produktu bakarra eta berritzailea da.

 

 

Think Big aukera bikaina da talentu gaztea ikusgarri egiteko eta talentu hori sarean lanean jartzeko…

Horrelako lehiaketak funtsezkoak dira ideiak dauzkaten pertsonek ideia horiek erakuts ditzaten, eta baita ere beste lehiakide batzuekin esperientziak partekatzeko. Egia esan, harrituta gelditu ginen ikusi genuenean zenbat proiektu aurkeztu ziren eta nolako kalitatea zuten. Proiektu orotan antzeman genuen pertsona bakoitzak bere ideian jarri duen ilusioa; espero dut gehienak martxan jarriko direla, onuragarria litzatekeelako gizartearentzat eta gure inguruko ekonomiarentzat. Zentzu horretan, oso garrantzitsua da erakundeen inplikazioa, erabilitako baliabideek aberastasuna itzuliko bailiokete lurraldeari.

 

 

Laguntza teknikoa eta baliabide ekonomiko batzuk ere jasotzen dituzue, ezta? 

Bai, hasieratik jarri ziren gurekin harremanetan, gure proiektua zertan datzan jakiteko eta aholkularitza ematen digute edozein zalantza edo galdera argitzeko. Gainera, lehiaketa antolatzen duen Zitek erakundeak bulego bat utzi digu lanerako eta gure proiektuarekin jarraitzeko.

Bestalde, diru-laguntza oso garrantzitsua da, ilusioa eta anbizioa ez baitira nahikoa; egia esan, baliabide ekonomikoak beharrezkoak eta funtsezkoak dira edozein proiektu martxan jartzeko. Eskerrak eman nahi dizkiogu Zitek erakundeari; horrelako ekimenak beharrezkoak dira gazteek beren ideiak egia bihurtu eta ametsak bete ditzaten.

 

 

Sari honek animatzen zaituzte etorkizunean ekintzaile izatera ala aztertzen ari zarete besteren kontura lan egitea?

Sari hau izan da enpresa bat sortzeko behar genuen behin betiko “bultzadatxoa”. Egia esan, ekimenak muntatzearen eta ekintzaile izaten jarraitzearen aldekoak gara, espiritu horixe daukagu geure barruan.

Gustatzen zaigu arima libreak izatea eta errutinazko lanetatik urruntzea!

 

 Segurleku Taquilla

ZITEK eta Think Big lehiaketaren 2016ko edizioari buruz:

ZITEK programak laguntza ematen die negozio edo enpresaren bat martxan jarri nahi duten Bizkaiko UPV/EHUren Campuseko unibertsitate-komunitateko kideei (ikasleak, tituludunak, irakasleak, ikerlariak eta administrazioko langileak). Euskal Herriko Unibertsitateak, ZITEK programaren bitartez, helburutzat dauka enpresa-ehunaren sorrera sustatzea, eta horretarako, oinarritzat hartzen ditu ikerketa taldeetako I+G+B-ren emaitzetatik datozen ideia ekintzaileak, baina baita ere Bizkaiko campusarekin lotura duen edo izan duen edozein ekintzailerenak.

2016ko edizioan 66 lagunek (31 emakume eta 35 gizon) 28 proiektu aurkeztu dituzte. ZITEKek antolatu du lehiaketa, eta erakunde hauetako ordezkariek osatu dute epaimahaia: UPV/EHU, BEAZ (Bizkaian Ekonomia eta Berrikuntza Sustatzeko Sozietate Publikoa) eta Bizkaiko Foru Aldundia.

Bestalde, hauexek izan ziren sari-emaileak: Carmelo Garitaonandia, Bizkaiko UPV/EHUren campuseko errektore-ordea; Ainara Basurko, BEAZeko zuzendari nagusia; eta Eva Armesto, Bizkaiko Foru Aldundiko Ekonomi eta Lurralde Garapena Sustatzeko Saileko zerbitzu-burua.

 

Berrikuntza 30 uztaila, 2020
Innobasque, 2020 prospektiba-txostena

Berrikuntza lankidetzan, jasangarritasuna eta digitalizazioa, Covid-19ko errealitate berrirako...Leer más

“Orbea kooperatibak irismen handiko argiak izan behar ditu, eta baditu”

Orbea hitzarekin Euskadin pisu industrial handienetakoa duen marka bat izendatzen ari gara; eta...Leer más

First Lego League España
Berrikuntza 28 uztaila, 2020
Bi euskal talderen berrikuntza eta ekintzailetza saritua izan da First Lego League España lehiaketan

Euskadi punta-puntako eskualdea da berrikuntzaren sektorean, eta  etorkizunari...Leer más

Berrikuntza 24 uztaila, 2020
371 euskal erakundek Europako berrikuntza funtsaren ia 700 milioi euroko dirulaguntzak eskuratu dituzte

  Euskadi da nanoteknologia eta bioteknologia arloetan Horizontea 2020 programaren...Leer más

Oveja Latxa Ternua

Linkedin-a

Eguneroko informazioa, jarduera-sektoreka eta intereseko
hartzeko.

Laguntza berriei buruzko azken orduko albisteak

ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.

Interesgarria, ezta?