Euskadiko I. Hekuntza Robotika Txapelketa egingo da irailaren 23an Astelena Pilotalekuan

18 September, 2017

8 eta 16 urte bitarteko 100 bat gaztek eman dute parte hartzeko izena 37 taldetan banatuta; egitasmoaren baitan bideojoko eta robotika tailerrak eskainiko dira eta erakustaldiak egiteko gune bat egongo da, haur eta gazte guztiei zabalik: drone eta roboten erabilera, programazioa, 3D inprimaketa… Egitasmoa Eibarko Udalak sustatu du eta Debabarreneko Udalen atxikimendua jaso du. Hainbat erakunde eta entitateren laguntza jaso du: SPRI, Gipuzkoako Foru Aldundia, Laboral Kutxa, Obra Social “la Caixa”, Kutxa Fundazioa, SD Eibar Fundazioa eta EPC enpresa. Debabarreneko 131 haur eta gaztek parte hartu dute (horietatik 29 neska) uda honetan egin diren tailer teknologikoetan, Txapelketaren atariko gisa.

 

 

Euskadiko lehen Hekuntza Robotika Txapelketa izango da Eibarren datorren larunbatean, hilak 23, Gazterobotika izenburupean (www.gazterobotika.eus). Astelena pilotalekuan egingo da, goizeko 10:00etatik aurrera. Egitasmoa Eibarko Udaleko Garapen Ekonomikorako Sailak sustatu du eta hainbat erakunde eta entitateren laguntza jaso du, hala nola, Spri, Gipuzkoako Foru Aldundia, Laboral Kutxa, Obra Social “la Caixa”, Kutxa Fundazioa, SD Eibar Fundazioa eta EPC enpresa.

 

Ekimena robotika arloan espezialista den Doplay enpresak antolatu du eta Debegesa eskualdeko garapen agentziaren esku egon da koordinazioa.

 

Robotikaren eta teknologia berrien inguruko topaketa izan nahi du Gazterobotika Txapelketak; 8 eta 16 urte bitarteko haur eta gazteak motibatzea du helburu, robotikan eta programazioan lehen urratsak eman ditzaten, aldi berean talde-lana eta arazoei aurre egiteko gaitasuna landuz. Zientzia, teknologia, ingeniaritza, artea eta matematikarekiko interesa piztea helburu duen hezkuntza proiektua da (STEAM kontzeptua).

 

Txapelketan 8 eta 16 urte bitarteko 100 bat lagunek parte hartuko dute, 37 taldetan banatuta. Gaztetxoek euren buru-argitasuna eta abilezia neurtuko dituzte hainbat probatan, eurek diseinatu, programatu eta eraiki dituzten roboten bitartez. Hain zuzen ere, gehientsuenek udan zehar Debabarrenean egin diren tailer teknologikoetan parte hartu dute.

 

Taldeak 4 kategoriatan lehiatuko dira eta taldean lan egiteko gaitasuna erakutsi beharko dute. Pilota jaurtiketa modalitatean 13 talde ariko dira elkarrean artean lehian. Euren punteria probatu beharko dute; robotak jomuga bat jo eta bola bat ahalik eta urrutien bota beharko du. Sumo Combat lehiaketan 12 taldek eman dute izena eta aurkaria joko eremutik ateratzea izango dute helburu garaipena eskuratu nahi badute. 8 talde ariko dira oztopo lasterketa deritzon proban. Ahalik eta denbora gutxienean helmugara iristea lortu behar du robotak eta, horretarako, bidean diren trabak saihestu behar ditu, hauek detektatu eta duten kolorea irakurriz. Azken proba kubo pilaketa izango da. Konplexutasun handikoa eta teknikoki zaila. 4 talde lehiatuko dira. Robotak koloretako hainbat bloke garraiatu eta, jarraian, orden zehatz batean bata bestearen gainean utzi behar ditu.

 

Gazterobotika egitasmoaren aurkezpen ekitaldia gaur izan da eta bertan izan dira, besteak beste, Eibarko Udaleko Garapen Ekonomikoa, Enplegu eta Berrikuntza zinegotzia, Alberto Albistegui eta Spri-ko zuzendari nagusia, Alex Arriola. Albisteguik nabarmendu duenez, “Udalak, topaketa honekin, bi helburu bete nahi ditu: batetik, zientziarekiko eta teknologiarekiko bokazioa sustatu nahi dugu gaztetxoen artean, gazteentzat bizigarri eta erakargarri izan daitezen eduki zientifikoak eta teknologikoak, eta gainera, etorkizuneko aukera profesional interesgarria baitira. Bigarrenik, bereziki neskatilak erakartzea eta gerturatzea izan da helburua eta %30eko parte-hartzea lortzea hasiera ona da”.

 

Gazterobotika topaketak ordenagailuen gune bat ere izango du. Bertan, nahi duten haur eta gazte guztiek bideojokoen mundura murgiltzeko aukera izango dute. Scratch, Kodu, Minecraft eta Unity programak erabiltzen eta bideojokoak sortzen irakatsiko zaie (adinaren arabera), Doplay enpresak eskainiko dituen tailerren bitartez.

 

Gainera, Gazterobotika egitasmoaren baitan, erakustaldiak egiteko gune bat prestatuko da eta bertara hurbiltzen diren gaztetxo guztiek izango dute aukera teknologia aurreratuenak ikusi, probatu eta esperimentatzeko. Besteak beste, Eibarko Maker taldeak objetuak eskaneatuko ditu Kinect batekin ondoren 3Dn inprimatzeko; SPC Makeblock-eko kideek tailerrak egingo dituzte eta makeblock robot desberdinak eta airblock droneak erakutsiko dituzte; Doplay enpresak roboten arteko futbol partida antolatuko du, baita beste zenbait erronka ere taldeetan lehiatzeko; eta, Iruña Tecnologías enpresak robot berezi bat ekarriko du Eibarrera, lurretik merkantzia mugitzeko gai dena, oztopoak saihestuz.

 

Gazterobotikak goizeko 10:00etan zabalduko ditu ateak eta 14:00etan amaituko da diploma eta errekonozimendu banaketarekin. Hitzordu teknologiko honi buruzko informazioa www.gazterobotika.eus webgunean eskuratu daiteke. Sarrera irekia eta doakoa izango da.

 

Txapelketa hau STEAM (zientzia, teknologia, ingeniaritza, arteak eta matematikak, ingelesez) bokazioak gazteen artean sustatzeko Eibarko Udalaren apustu estrategikoaren baitan dago, eta taldeko lana du ardatz. Gaitasun teknikoak sustatzea etorkizuneko jardun ekonomikoa indartzeko asmoaren parte da, eskualdeko industriak izango dituen erronkei aurre egin ahal izateko.

 

Robotika-txapelketa salto kualitatiboa da, robotika-tailerrekin alderatuta (Ibilbide Teknologikoak), duela lau urtetik hona antolatu direnak. Tailerrek parte-hartzaile asko dituzte eta horiek ere Udaleko Garapen Ekonomikoaren Sailak antolatzen ditu, Lehen Hezkuntzako 3 mailatik Bigarren Hezkuntzako 4. mailara arteko ume eta gaztetxoentzat.

 

Erlazionatutako artikuluak

Orobat interesa dakizuke

View all arrow