Harpidetu zaitez gure newsletter-ak jasotzeko
Ezagutu euskal industria berriari buruzko albisteak, laguntzak eta ekitaldiak
Hemen kontatuko dizugu
Enpresa-garapenerako
euskal agentzia
Enpresa-garapenerako
euskal agentzia
Euskal enpresek, nazioartekotzen hasten direnean, Frantziako merkatura jo ohi dute lehenik. 2015ean, 1500etik gora enpresak esportatu zuten Frantziara. Merkatu horrek funtsezko negozio-aukera eskaintzen die euskal enpresei bere hurbiltasunagatik, daukan tamainagatik eta tokiko eskaintzarekin dagoen sintonia onagatik.
SPRIk eta Espainia eta Frantziako Merkataritza eta Industria Ganberek topaketa bat antolatu zuten, aztertzeko nola hurbildu Frantziako merkatura agente komertzialaren bitartez. Merkaturatze eredu hori oso hedatuta dago Frantzian, eta merkatuan sartzeko modu erabilienetako bat da bertan lan egin nahi duten atzerriko enpresentzat.
Jardunaldian landuko den formula horren arrakasta segurtatzeko, badira zenbait giltzarri: ohartzea agente komertzialaren figura egokiagoa dela beste merkaturatze modu batzuk baino, ondo ezagutzea Frantziako erregulazioaren berezitasunak, behar bezala zehaztea enpresarentzako agente komertzial on batek izan behar lukeen profila eta ondo ezagutzea agente horrekin harremantzeko alderdi praktikoak .
Miren Madinabeitia, SPRIko Nazioartekotze Arloko zuzendaria
SPRI Taldeko Nazioartekotze zuzendari Miren Madinabeitiak azpimarratu du euskal enpresek, nazioartekotzen hasten direnean, Frantziako merkatura jo ohi dutela lehenik. “Lehen bazkide komertziala da, eta euskal esportazioen lehen jomuga ere bai. 21 euskal enpresak produkzio ezarpenak dituzte han eta 144k presentzia komertziala dute. Gainera, Frantziako 34 enpresa daude Euskadin”.
Sebastian Álvarez, Frantzia eta Espainiako Merkataritza eta Industria Ganberako Azterlan eta Ezarpen Arloko arduraduna
Sebastián Álvarezek esan du Frantzia “abentura zaila dela, baina baduela bere ordaina”. Europako bigarren merkatu garrantzitsuena da Alemaniaren ostean, eta erosmen handikoa, “batez besteko soldata 2.800 euro gordinekoa baita [hilekoa]. Krisia sasoian, kontsumoa ez da guztiz erortzen”.
Álvarezek Frantziako sektore ekonomiko garrantzitsuenak aipatu ditu: nekazaritza eta elikadura industria, Frantzia munduko bosgarrena baita sektore horretan; nekazaritza, “Frantziako lehen industria” dena; aeronautika, besteak beste, Airbus erraldoia bertan baitago kokatuta; eta turismoa, Frantzia delarik sektore horretako mundu mailako liderra.
Agente komertzialaren figurari dagokionez, esan du aldea dagoela banatzailearekin konparatuz gero: “agente komertzialak kalean dabiltza, produktu esklusiboak saltzen dituzte eta merkataritzako prospekzio-lanak egiten dituzte”. Onartu du “agente on bat aurkitzea” dela zailena, baina, “funtsezkoa da Frantziako merkatuan lan egiteko” gaineratu du.
Marcos Martins, Frantziako Agente Komertzialen Federazio Nazionaleko -FNAC- agente komertziala eta ordezkaria
Marcos Martins agente komertzial frantsesak adierazi du Europa osoko 520.000 profesionalek osatzen dutela agente komertzialen kolektiboa; horietatik 30.000 profesionalek Frantzian lan egiten dute eta 54.000 euro fakturatzen dituzte, Frantziako BPGaren %2,5. “Agente komertziala gai da desberdintasun kulturalak aztertzeko eta ikerketa teknikoak egiteko, merkatuko prospekzio burua da eta baita negoziatzaile ona ere. Bezeroaren eta hornitzailearen arteko kudeaketa-lanak egiten ditu”.
Nuria Bové Espinalt, Abokatua Bartzelona eta Pariseko bulegoetan. Iberian Desk,GIDE LOYRETTE NOUEL A.A.R.P.I.
Parisen lan egiten duen Nuria Bové abokatuak azaldu du nola kontratatzen diren agente komertzialak Frantzian. Oro har langile autonomoak dira, baina kobratutako komisioen araberako kalte-ordaina jasotzeko eskubidea dute kontratua etenez gero. “Egoera kasu bakoitzaren arabera negoziatzen da, hau da, kasuan kasuko joko-arauak ezartzen dira. Banatzailearen figura ere hor dago, baina agente komertzialen kontratuak desberdinak izaten dira. Banatzailearentzat ez dago kalte-ordainik; banatzaileak erosi egiten du berriro saltzeko, eta ez du komisiorik kobratzen”.
Kontratua ahozkoa izan daiteke, eta, enpresariak beretzat onuragarriagoa dela pentsa dezakeen arren, abokatuak gomendatu du idatzizko kontratuak egitea, “anbiguotasunak saihesteko”. Orobat esan du proba-aldiak ere egiten direla, eta horrelakoetan ez da kalte-ordainik eman behar harremana etenez gero. “Ohikoena da agente komertzialen sare batekin hastea lanean eta gero Frantzian kokatu edo banatzaile bat aukeratu. Agente komertzial on batek azkar informatzen du merkaturatze-politika zuzendu ahal izateko”.
Hemen aurki ditzakezu gure ekitaldiak, argitalpenak eta eduki guztiak.
