Agente komertziala, funtsezkoa Frantzian negozioak egiteko

5 May, 2016

SPRI Taldeak antolatutako jardunaldi batean adierazi da profesional horiek kalean dabiltzala, produktu esklusiboak saltzen dituztela eta merkataritzako prospekzio-lanak egiten dituztela.

 

Frantziak 30.000 agente komertzial ditu eta profesional horiek 54.000 milioi euro fakturatzen dituzte, hots, Frantziako BPGaren %2,5. Jardunaldira joan diren euskal enpresariek batez ere bi gai hauek mahaigaineratu dituzte: kontratazio modalitatea eta kontratua etenez gero ordaindu beharreko kalte-ordainak.

 

SPRIk (Ekonomiaren Garapen eta Lehiakortasun Sailaren menpeko enpresen garapenerako agentziak) eta Espainia eta Frantziako Merkataritza eta Industria Ganberak ostegun honetan Bilbon antolatu duten jardunaldian aztergai izan da nolako garrantzia duen Frantzian agente komertzialaren figurak han negozioak egin nahi dituzten euskal enpresentzat. “Funtsezkoa da Frantziako merkatuan lan egiteko” adierazi du Sebastián Álvarezek, Espainia eta Frantziako Ganberako Azterlan eta Ezarpen Saileko arduradunak.

 

SPRI Taldeko Nazioartekotze zuzendari Miren Madinabeitiak azpimarratu du euskal enpresek, nazioartekotzen hasten direnean, Frantziako merkatura jo ohi dutela lehenik. “Lehen bazkide komertziala da, eta euskal esportazioen lehen jomuga ere bai. 21 euskal enpresak produkzio ezarpenak dituzte han eta 144k presentzia komertziala dute. Gainera, Frantziako 34 enpresa daude Euskadin”.

 

[pullquote]Europako bigarren merkatu garrantzitsuena da Alemaniaren ostean, eta erosmen handikoa, batez besteko soldata 2.800 euro gordinekoa baita[/pullquote]

Sebastián Álvarezek esan du Frantzia “abentura zaila dela, baina baduela bere ordaina”. Europako bigarren merkatu garrantzitsuena da Alemaniaren ostean, eta erosmen handikoa, “batez besteko soldata 2.800 euro gordinekoa baita [hilekoa]. Krisia sasoian, kontsumoa ez da guztiz erortzen”.

 

Álvarezek Frantziako sektore ekonomiko garrantzitsuenak aipatu ditu: nekazaritza eta elikadura industria, Frantzia munduko bosgarrena baita sektore horretan; nekazaritza, “Frantziako lehen industria” dena; aeronautika, besteak beste, Airbus erraldoia bertan baitago kokatuta; eta turismoa, Frantzia delarik sektore horretako mundu mailako liderra.

 

Agente komertzialaren figurari dagokionez, esan du aldea dagoela banatzailearekin konparatuz gero: “agente komertzialak kalean dabiltza, produktu esklusiboak saltzen dituzte eta merkataritzako prospekzio-lanak egiten dituzte”.  Onartu du “agente on bat aurkitzea” dela zailena, baina, “funtsezkoa da Frantziako merkatuan lan egiteko” gaineratu du.

 

Marcos Martins agente komertzial frantsesak adierazi du Europa osoko 520.000 profesionalek osatzen dutela agente komertzialen kolektiboa; horietatik 30.000 profesionalek Frantzian lan egiten dute eta 54.000 euro fakturatzen dituzte, Frantziako BPGaren %2,5. “Agente komertziala gai da desberdintasun kulturalak aztertzeko eta ikerketa teknikoak egiteko, merkatuko prospekzio burua da eta baita negoziatzaile ona ere. Bezeroaren eta hornitzailearen arteko kudeaketa-lanak egiten ditu”.

 

[pullquote]Agente komertzial on batek azkar informatzen du merkaturatze-politika zuzendu ahal izateko[/pullquote]

Parisen lan egiten duen Nuria Bové abokatuak azaldu du  nola kontratatzen diren agente komertzialak Frantzian. Oro har langile autonomoak dira, baina kobratutako komisioen araberako kalte-ordaina jasotzeko eskubidea dute kontratua etenez gero.  “Egoera kasu bakoitzaren arabera negoziatzen da, hau da, kasuan kasuko joko-arauak ezartzen dira. Banatzailearen figura ere hor dago, baina agente komertzialen kontratuak desberdinak izaten dira. Banatzailearentzat ez dago kalte-ordainik; banatzaileak erosi egiten du berriro saltzeko, eta ez du komisiorik kobratzen”.

 

Kontratua ahozkoa izan daiteke, eta, enpresariak beretzat onuragarriagoa dela pentsa dezakeen arren, abokatuak gomendatu du idatzizko kontratuak egitea, “anbiguotasunak saihesteko”. Orobat esan du proba-aldiak ere egiten direla, eta horrelakoetan ez da kalte-ordainik eman behar harremana etenez gero. “Ohikoena da agente komertzialen sare batekin hastea lanean eta gero Frantzian kokatu edo banatzaile bat aukeratu. Agente komertzial on batek azkar informatzen du merkaturatze-politika zuzendu ahal izateko”.

 

Jardunaldia SPRI Taldearen Bilboko egoitzan izan da eta hauexek izan dira aretoa leporaino bete duten ehun enpresariek mahaigaineratu dituzten gai garrantzitsuenak: kontratazio modalitatea, kontratuaren klausulak, kontratua eteteko moduak eta kalte-ordainak.

 

 

Erlazionatutako artikuluak

Orobat interesa dakizuke

View all arrow