Prestakuntza Directiv@21-SPRI: “Enpresek bezeroekin hitz egitera joan behar dute”

2014ko Iraila 23,


SPRI Taldeak bultzatutako ikastaro batean German Gómez aholkulariak aurrez aurreko elkarrizketak, eta ez inkestak,  defendatu ditu bezeroaren asebetetzea neurtzeko tresna bezala.

 

Bere iritziz, konpainiek bezeroarekin harremanetan jartzeko ereduak eduki behar dituzte beren egituran, kanpoko aholkulariengana jo beharrean.

 


“Enpresek bezeroekin hitz egitera joan behar dute”. Ekonomiaren Garapen eta Lehiakortasun Sailaren menpeko SPRI enpresa agentziak bultzatu duen Prestakuntza Directiv@21 ikastaroan, Germán Gómez aholkulariak defendatu du konpainiek harreman mota berri bat lortu behar dutela beren negozioa mantentzen dutenekin. Ekimen horren helburua da euskal enpresak berritzaileagoak eta lehiakorragoak  izatea.

Hamabost bat konpainiak parte hartu dute ostegunean Arabako Teknologi Parkean eginiko ikastaroan, non aztertu baitituzte bezeroek enpresei egiten dizkieten ekarpenak.

Gómezek azaldu duenez, bezeroen asebetetzeari eta enpresak eskaintzen zituen produktuei buruzko merkatu azterketetan oinarritu ohi ziren lehen bezeroak leialtzeko edo bezero berriak bilatzeko estrategiak. “Niri, ordea, aholkulari gisa gertatzen zitzaidana zen kudeatzailea nigana etortzen zela, galdetzen zidala produktu batek salmenta ona izango ote zuen eta ez nuela jakiten zer erantzun”. Aholkulariak egiaztatu zuen bezeroekin egindako elkarrizketa kualifikatuek askoz ere informazio gehiago ematen zutela inkesta sinple batek baino. “Inkestak egitea baino askoz garrantzitsuagoa da bezeroekin hitz egitea”, azpimarratu du German Gómezek, eta aitortu du gaur egun ez duela inkestarik egiten enpresei aholkularitza ematean.

Ikastaroan argi geratu da badagoela beste gauza bat ere nahitaez aldatu beharrekoa bezeroekiko harremanetan: enpresek eredu batzuk izan behar dituzte beren egituran aholkulari funtzioak betetzeko eta bezeroekin hitz egiteko. “Eta antolakunde osoa izan dadila -ez bakarrik zuzendaritza taldea edo merkataritza arloa-, hau da, biltegian edo makinetan daudenetatik hasita”.

Halaber, aholkulariak azpimarratu du aldatu egin behar dela eredu tradizionala eta bezeroari utzi behar zaiola mintzatzen bezero atzemaileari baino lehen. “Hobe da aurrena bezeroak hitz egitea eta gero hornitzaileak”. Eta enpresa barruan, bezeroari buruzko informazio ona edukitzeaz gain, datu horiek guztiak antolakunde osoan partekatu behar dira. “Ezin dira egon gutxi batzuen eskuetan”.

Ikastaroan parte hartutako enpresek azpimarratu dute garrantzitsua dela “beheraino iristea” bezeroekiko harremanetan. Parte-hartzaileetako batek adibide bat jarri du esperientzia pertsonal bat kontatuz. “Ontzi garbigailuak fabrikatzen zituen enpresa bateko ingeniaritza sailean lan egiten nuen eta arazoak izan genituen, tabernetan sarri hondatzen ziren-eta. Makinak indartzeko eskatzen ziguten, baina alferrik saiatu ginen. Orduan, bezeroekin zuzenean harremanetan jarrita jakin genuen zein zen arazoa: tabernetako langileek ontzi garbigailuaren azpil irekia erabiltzen zuten barraren goiko aldeko gauzak hartzeko plataforma gisa. Eta arazoa konpondu genuen”.

Ikastaroan bereziki azpimarratu da elkarrizketak ez duela izan behar denbora mugarik eta bezeroak berak aukeratu behar duela hizketa-gaia. “Hasieran beharbada pentsatuko du elkarrizketa hori ez dela oso serioa, baina gero berak bilatuko du berari axola dion gairen bat eta interes handiz azalduko dit”.

Erlazionatutako artikuluak
Orobat interesa dakizuke