Zure negozioarentzako ikastaro praktikoak: bideragarria al da nire negozio ideia?

7 March, 2013

Martxoaren 7an (osteguna), Emprendedores argitalpeneko erredaktore Fco. Javier Inarajak negozioen bideragarritasunari buruzko tailer bat eskaini zuen ekintzaileentzat.

Fco. Javier Inarajak tailer bat eman zuen azaltzeko zein alderdik duten eragina gure enpresak bideragarri izan daitezen eta etorkizuneko proiektu bihurtu daitezen.

“100 ideiatik 15 bakarrik iristen dira enpresa izatera. 15 horietatik %60 inguruk hiru urte baino gutxiago irauten dute”. Fco. Javier Inarajak esaldi horrekin hasi zuen bere tailerra bertaratutako guztioi azaltzeko garrantzitsua dela gure negozio ideiaren bideragarritasuna aztertzea.

Geure negozio ideia praktikan jarri eta negozio horretan inbertitu baino lehen, hainbat alderdi garrantzitsu pentsatu behar ditugu:

 

  • Zein abantaila eskaintzen ditu nire produktu/zerbitzuak jada merkatuan dagoenarekin alderatuta?
  • Zeintzuk dira nire bezeroak?
  • Zergatik ordainduko dute bezeroek nire produktu/zerbitzuen truke?
  • Nolakoak dira nire lehiatzaileak?
  • Zein merkatutara aterako ditut?
  • Zenbateko inbertsioa egin behar dut?
  • Noiz hasiko naiz diru-sarrerak eta onurak sortzen?

 

1.- Zein abantaila eskaintzen ditu nire produktu/zerbitzuak jada merkatuan dagoenarekin alderatuta?

 

Enpresa batek gainerakoengandik bereizi nahi badu, lehiak asetzen ez duen premia erreal bat estali behar du.

Produktu berritzaileek egoera berriak sortzen dituzte merkatuan eta produktu askok porrot egiten dute merkaturatzeko unean inork jaramonik egin ez dielako.

Interesgarria litzateke gure produktu edo zerbitzuari test bat egitea eta Gutxieneko Produktu Bideragarria (GPB) lortzea enpresaren bideragarritasuna eta merkatuaren nahiz bezeroen onarpena baliozkotzeko.Lean Startup enpresa-metodologia kontzeptu horretan oinarrituta dago: ideia bat abiapuntutzat hartuta produktu/zerbitzu bat eraikitzen da, onarpen test bat egiten da eta lortutako informazioren bidez ikasitakoa aplikatzen zaio hasierako ideiari. Gutxieneko Produktu Bideragarriak ziklo bat betetzen duenean, berriro hasten da prozesua produktu aldatuarekin.

Enpresek oso ongi landu behar dute prezioaren aldagaia, akatsik gabe. Ikusirik zein abiaduran birproduzitzen diren arrakasta ereduak, prezioa elementu erabakigarri bihurtu da merkatuan finkatzeko edo porrot egiteko.

 

2- Zeintzuk dira nire bezeroak?

Enpresek beren produktu/zerbitzuen publiko potentziala identifikatu behar dute. Komeni da “nukleo gogorra” detektatzea eta sailkatzea, hau da, jakitea nortzuk diren gure produktu/zerbitzuak gehien erakarriko dituztenak.

Batzuetan ahaztu egiten dugu hasieran garrantzitsuena dela geure burua ezagutzera ematea. Inork ez digu ezer erosiko, baldin eta ez badaki zer egiten dugun.

 

3- Zergatik ordainduko dute bezeroek nire produktu/zerbitzuen truke?

Jakin behar da ba ote dagoen nireen antzeko produktu/zerbitzurik erosten duen jende-multzorik, eta, bestalde, gure produktu/zerbitzuak erostera eramango dituzten elementu bereizleak identifikatu behar dira.

Hasierako fasean, bezeroei aktiboki entzuten zaienean, ezinbestekoa da bideragarritasun maila neurtzea. .

 

4- Nolakoak dira nire lehiatzaileak?

Enpresek lan handia egin behar dute lehia ebaluatzeko eta aldagai hauek aztertzeko::

  • Nortzuk dira?
  • Zer eskaintzen dute eta nola eskaintzen dute?
  • Zeintzuk dira beren bezeroak?
  • Zeintzuk dira beren prezioak?
  • Zeintzuk dira beren benetako abantailak?
  • Zeintzuk dira berekiko ditudan abantailak?
  • Beren zein elementu barneratu beharko nuke nik?
  • Zein alderdi zabaldu, aldatu edo hobetu behar nituzke?

Lehiari buruzko aldagai horiek denak ebaluatzeko modu on bat lehiaren bezero bihurtzea da, horrela jakingo duzu zer hobetu eta zer kopiatu behar zenukeen. Batzuetan hobe da “zuhurtziaz” kopiatzea berritzen saiatzea baino .

 

5- Zein merkatutara aterako ditut?

Komunikazio eta logistika arloetako hobekuntzei esker, enpresa txikiek aukera dute duela urte batzuk pentsa ezinezkoak ziren tokietara iristeko. Gainera, Internetek malgutasun handia ematen die enpresei beren eskaintza jomuga publiko desberdinetara zuzentzeko orduan.

Azken urteotan produktuak merkaturatzeko formula berriak ere sortu dira, esaterako Window Shop-in deiturikoa, hots, gure erakusleihoetan tokitxo bat egitea beste enpresa batzuen produktu osagarriei.

 

6- Zenbateko inbertsioa egin behar dut?

Oso garrantzitsua da negozio plan bat izatea, baina baita ere ekonomia-finantza plan definitu bat edukitzea, non salmenta plana, diruzaintzako aurreikuspena eta emaitzen kontua jasoko baitira. Horrela, “paperean” frogatuko dugu gure negozioa bideragarria dela.

Gure negozio ideiarentzat finantzaketa lortzeko, ezinbestekoa da errealista izatea. Beraz, ekintzaileek beren dirua arriskatu behar dute edo bestela Family, Friends and Fouls hirukotearena (Familia, Lagunak eta Inozoak).

Finantza erakunde baten mailegua lortu nahi badugu, ondare bermeak eskaini behar dizkiogu edo, bestela, mikro-kreditu bat lortzeko baldintzak bete beharko ditugu.

Diru-laguntza publikoak murriztu egin dira administrazioek jasandako mozketen ondorioz, baina hala ere eskatu egin behar dira.

Business Angels delakoek eta Arrisku Kapitalek tamaina handiko proiektuak bilatzen dituzte, azkar hazteko potentziala dutenak, eskalagarriak eta puntako sektoreetakoak.

 

7- Noiz hasiko naiz diru-sarrerak eta onurak sortzen?

Oso kontuan hartu behar dira bezeroen ordainketa epeak eta ordainketa finko nahiz aldakorrenak. Enpresek testuinguru okerrenaren arabera aztertu behar lukete beren finantza egoera. Bereziki zaindu beharko da negozioen urtarotasuna, denek izaten baitituzte eskaera arloko gorabeherak.

AMIA (Ahultasunak, Mehatxuak, Indar-guneak eta Aukerak) da negozioen bideragarritasuna ebaluatzeko metodo sinple eta ezagun bat. Badaude baita ere negozioen bideragarritasuna aztertzeko metodo konplexuagoak, esaterako, Alexander Osterwalderren Canvas metodoa, hiru elementutan zentratzen dena: barneko faktoreetan (bazkide garrantzitsuenak, baliabide garrantzitsuenak eta kostuen egitura), balio proposamenetan (zein balio ematen diogun bezeroari, zein arazo konpontzen lagunduko diogun bezeroari, zein produktu/zerbitzu linea eskaintzen ditugun bezero segmentu bakoitzean, bezeroen zein premia asetzen ditugun), eta kanpoko faktoreetan (bezeroekiko harremanak, bezero segmentuak, salmenta eta salmenta ondorengo kanalak edo diru-sarrera lineak).

Enpresek berdin tratatu behar dituzte bezero guztiak, baina saritu egin behar dituzte errentagarrienak.

 

Erlazionatutako artikuluak

Orobat interesa dakizuke

View all arrow